<p style="text-align: justify;">کابل (پژواک، ۱۴ مرغومې ۱۴۰۱): کابینې په ټولو دولتي ادارو کې د امکان تر بریده له کورنیو تولیداتو او محصولاتو د ګټې اخیستنې پرېکړه کړې او یو پلاوی یې ټاکلی چې د سالنګ تونل له لارې دي د تګ راتګ ستونزو حل ته طرحه جوړه کړي.</p>
<p style="text-align: justify;">د چارو ادارې په خبرپاڼه کې راغلي چې تېره ورځ رییسالوزراء په مشرۍ د کابینې ۱۹مه غونډه ترسره شوه.</p>
<p style="text-align: justify;">سرچینې لیکلي، په دې غونډه کې پرېکړه وشوه چې د کورني تولید او محصول د کارونې او مصرف په اړه دې عامه پوهاوي کې د اطلاعاتو او فرهنګ، ارشاد، حج او اوقافو، پوهنې او لوړو زدهکړو وزارتونه برخه واخلي او د صنعت او سوداګرۍ وزارت د فابریکو څښتنان دې باکیفیته او د باور وړ تولید لپاره وهڅوي.</p>
<p style="text-align: justify;">خبرپاڼه کې راغلي، د صنعت او سوداګرۍ وزارت وړاندیزونه تایید شول چې پر اساس به يې په ټولو امارتي ادارو کې تر ممکنه بریده له کورنیو تولیداتو او محصولاتو ګټه اخیستل پیل شي.</p>
<p style="text-align: justify;">سرچینه زیاتوي، د کابینې په دې غونډه کې د ټولګټو وزارت د مرستیال په مشرۍ د ټرانسپورټ او هوايي چلند وزارت مرستیال، د لويې څارنوالۍ د مرستیال او تخنیکي اشخاصو په ګډون پلاوي ته دنده وسپارل شوه چې د سالنګ لويې لارې تونل له نږدې وګوري او د پر دې لاره د تګ راتګ ستونزو په تړاو دې طرحه د کابینې ناسته کې شریکه کړي.</p>
<p style="text-align: justify;">همدارنګه یاد پلاوي ته دا دنده هم سپارل شوې چې شمال ته د سالنګ لويې لارې ترڅنګ دې پر بدیلې ترانزیټي لارې غور وکړي چې څرنګه، په څومره وخت او څومره امکاناتو برابرېدلی شي او بشپړ راپور دې یې کابینې ته وړاندې کړي.</p>
<p style="text-align: justify;">په سالنګ تونل کې- چې د هېواد مرکز له شمالي ولایتونو سره نښلوي – د لېندۍ په ۲۷مه یو ټانکر چې سونتوکي په کې بار وو، د تخنيکي ستونزې له امله چپه شو او اور یې واخیست چې له امله یې یو شمېر موټر وسوځېدل.</p>
<p style="text-align: justify;">د راپورونو له مخې، په دې پېښه کې ۳۱ کسان مړه او ۳۷ نور ټپيان شول.</p>
