د امو سیند زیانونو مخنیوي لپاره دوه میلیارد افغانۍ ځانګړې شوې دي

کابل (پژواک، ۱۹ مرغومی ۱۴۰۱): موظف پلاوی وایي، امو سیند خلکو ته د زیانونو اړولو ترڅنګ د افغانستان ۲۵ کیلومتره خاوره لاندې کړې او کابینې د زیان د سملاسي مخنیوي لپاره دوه میلیارد افغانۍ ځانګړې کړې دي.

د امو سیند د بدخشان د پامیر له غرونو سرچینه اخلي او ۱٬۱۲۶ کیلومتره یې د افغانستان د بدخشان، تخار او کندوز ولایتونو او تاجکستان، ازبکستان او ترکمنستان ترمنځ بهېږي.

پژواک خبري اژانس د روان کال د لړم په اتمه د کندوز او تخار د یو شمېر اوسېدونکو شکایت له مخې راپور خپور کړ چې په امو سیند کې په پرله‌پسې توګه د اوبو کچې ډېرېدو او پورته کېدو له امله د یادو ولایتونو د خلکو کرنیزې ځمکې او کورونه ویجاړ شوي او که دې ستونزې ته رسېدنه ونه شي، د سیند غاړې ډېرې کرنیزې ځمکې او کورونه به تر اوبو لاندې شي.

له يادو شکایتونو وروسته کابينې یو پلاوی وټاکه څو د امو سیند د تخریباتو هراړخیزه څېړنه وکړي او د دې ستونزې د حل طرحه د کابینې غونډې ته وړاندې کړي.

د یادې پرېکړې له مخې، په طرحه کې باید د تخریب شوو او یا تر ګواښ لاندې سیمو په نښه کول، د رامنځته شوو تخریباتو بیارغونې او په راتلونکي کې د نورو تخریباتو مخنیوي لپاره اړین تدبیرونه او د لګښتونو اټکل شامل وي.

د حکومت د اطلاعاتو او رسنيو مرکز نن (د مرغومي ۱۹مه) ليکلي چې د اسلامي امارت پلاوي د امو سیند د ویجاړیو له څېړلو وروسته ويلي چې دغه سیند د سرحدي سیمو اوسېدونکو ته مالي زیانونه اړولي، د افغانستان ۲۵ کیلومتره خاوره یې لاندې کړې او که د سیند غاړې پخې نشي، د نورو ویجاړيو وېره هم شته.

سرچينه زياتوي، د امو سیند له کلونو را په دېخوا د افغانستان خاوره وړي او ډېرې ځمکې یې پر سیند ورګډې شوې دي.

د یاد پلاوي مشر او د کرنې او مالدارۍ وزیر عطاءالله عمري ویلي چې یاد سیند په ځینو ځایونو کې ۱۵ کیلومتره او ان ۲۵ کیلومتره د افغانستان خاوره لاندې کړې ده.

د حکومت د اطلاعاتو او رسنيو مرکز وایي، د اوبو برېښنا وزارت مرستیال مجیب‌الرحمن او د یاد پلاوي غړي ټینګار کړی چې د کابینې له خوا دوه میلیارد افغانۍ د زیان د سملاسي مخنیوي لپاره ځانګړې شوې دي.

د قومونو او قبایلو چارو وزارت مرستیال محمداسماعیل او د یاد پلاوي بل غړي بیا ویلي چې زیانمنو شوو خلکو ته به د ژوند ښه کولو زمینه برابره او صفري ټکي به وټاکل شي.

د پژواک د یوه خپاره شوي راپور له مخې، د سیمې خلکو ویلي وو چې په تېر حکومت کې د یادې ستونزې هواري ډېرې ژمنې وشوې، خو تر اوسه هيڅ پام ورته نه دی شوی.

د رسنیو مرکز هم لیکلي چې هر کال د دغه سیند ترڅنګ د پرتو ولسوالیو اوسېدونکو ته د اوبو له امله ډېر زیانونه اوړي او خلکو یې ویلي چې په تېرو شلو کلونو کې یې پخوانیو حکومتونو غږ وانه ورېد، له همدې امله یې ډېر مالي زیانونو ولیدل.