ترینکوټ (پژواک، ۶ سلواغه ۱۴۰۱): د اروزګان په مرکز ترینکوټ کې له تېرو جګړو د هاوان یوې پاتې مرمۍ چاودنې له امله یو کس وژل شوی دی.
د دغه ولایت امنیې قوماندانۍ د امنیت امر مولوي امینالله پژواک خبري اژانس ته وویل، پېښه پرون غرمه د ترینکوټ ښار په خانقې سیمه کې هغه مهال شوې چې د عزتالله په نوم یوه ځوان غوښتل د خپل کور دېوال ونړوي.
هغه زیاته کړه، په دېوال کې له تېرو جګړو د هاوان یوه ناچاوده مرمۍ پاتې وه چې د کولنګ له لګېدو سره یې چاودنه کړې او یاد ځوان ځای پر ځای وژل شوی دی.
د خانقې سیمې اوسېدونکی او د وژل شوي کس ورور پښتون پژواک خبري اژانس ته وویل، دلته ډېرې سیمې په تېرو کلونو کې د جګړې د لومړۍ کرښې په توګه کارېدې چې له هماغه وخته په کې ناچاودې مرمۍ او ماینونه پاتې دي.
دی وايي، دغه توکي د خلکو ژوند ګواښي، مسوولین یې باید د له منځه وړو لپاره اقدام وکړي.
په اروزګان کې پخوا هم ورته پېښې شوې او په وار وار د تېرو جګړو ناچاوده توکو او ماینونو خلکو ته مرګژوبله اړولې ده.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن