مزارشریف (پژواک، ٦ سلواغه ۱۴۰۱): بلخ کې یو شمېر خلک او مسوولین وایي، د دغه ولایت په مرکز مزارشریف کې د روضې ځینې برخې تخریب شوې او زیاتوي، که ونه رغول شي، ښايي نورې برخې یې هم ژر ویجاړې شي.
د مزارشریف روضې ریاست فني مدیر انجینر زلمي انصاري پژواک ته وويل چې د روضې ودانۍ له تېرو څو لسیزو راهیسې د زلزلې، واورې، بارانونو او چاودنې له امله زیانمنه شوې او ډېرې برخې یې بیارغونې او تحکمیاتو ته اړتیا لري.
هغه اندېښنه ښيي، که د دې تخریب شوو برخو بیارغونه ونه شي، نو ښایي د دې ودانۍ ډېره برخه نوره هم زیانمنه او یا له منځه ولاړه شي.
د دغه ریاست مرستیال حاجي عبدالواحد انصاري وایي چې د روضې د زیانمنو برخو د په نښه کولو سروې په ۱۳۹۶ لمریز کال کې پیل شوه.
نوموړی زیاتوي، د ۱۳۹۹ لمریز کال د زمري په ۲۰مه د روضې بیارغولو عملي چارې پیل شوې چې ٢٨ سلنه بشپړې شوې خو نور يې بيا د رغولو چارې په ټپه ودرېدې.
انصاري زیاتوي، په دې اړه یې د حج او اوقافو پر وزارت سربېره بېلابېلو ادارو ته مکتوبونه استولي خو تر اوسه یې په اړه هیڅ اقدام نه دی شوی.
په ورته مهال، د مزارشریف اوسېدونکي هم وایي چې حکومت باید د دغه ډول تاریخي میراثونو او ارزښتونه ساتنه وکړي.
د مزارشریف یو اوسېدونکی محمدعارف وویل، په تېرو کلونو کې حکومت د روضې بېلابېلو برخو ته پاملرنه کوله خو اوس ورته پاملرنه کمه شوې ده.
هغه زیاتوي، مزارشریف ښار د نوي کال په پیل کې د بېلابېلو بهرنیو او کورنیو مېلمنو کوربه وي او د روضې ویجاړې شوې برخې باید د نوي کال له پیله مخکې جوړې شي.
د مزار يو بل اوسېدونکى نصیب الله هم وایي چې د روضې ځینې برخې ویجاړې شوې او حکومت باید د پخوا په څېر ورته پاملرنه وکړي.
بلخوا د روضې ريیس محمدعالم مبارز هم مني چې د روضې ځینې برخې ویجاړې شوې خو وایي چې له اړوند ادارو سره یې په دې اړه خبرې کړې دي.
هغه ډاډ ورکوي چې د روضې بیارغولو چارې به ډېر ژر پیل شي او د نوي کال لپاره هم چمتووالی لري.
د بلخ مرکز چې هلته د حضرت علي روضې د شتون له امله په «مزارشریف» شهرت لري، د مورخینو په وینا، د حضرت علي رض جسد په ۱۳۰ قمري کال کې له نجف څخه دلته رالېږدول شوی دى.
د مزارشریف د روضې په محوطه کې د حضرت علي، وزیر محمداکبر خان، امیر شېرعلي خان د زیارتونو په ګډون د بېلابېلو ۵۲ نورو شخصیتونو زیارتونه هم شته.
Visits: 79
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن