کابل (پژواک، ۱۴ سلواغه ۱۴۰۱): د افغانستان د بیارغونې چارو کې د امریکا څارونکې اداره (سیګار) وايي چې امریکا د اسلامي امارت له واکمنېدو وروسته د افغانستان او افغان کډوالو لپاره څه باندې اته میلیارد ډالر ځانګړي کړي دي.
د سیګار په راپور کې د دغه مطلب ترڅنګ راغلي چې دوه میلیارد ډالر د لومړنیو بشري او پرمختیايي مرستو، درې نیم میلیارد د افغانستان اماني صندوق او دوه اعشاریه اووه میلیارد نور امریکا ته د افغان کډوالو لېږدولو او مېشتولو لګښتونو لپاره دي.
سرچینې لیکلي، د افغانستان سرپرست حکومت له دې مرستو د «مالیې، بنسټونو ته د فعالیت جواز ورکولو او اداري لګښتونو» له لارې ګټه پورته کوي.
په راپور کې راغلي چې د افغانستان لپاره د امریکا مرسته په ناغوښتلې بڼه سرپرست حکومت ته مشروعیت ورکوي او په افغانستان کې د ښځو پر کار بندیز د مرستې رسونې پروسه له خنډ سره مخ کړې ده.
د سیګار په خبره، په افغانستان کې سږ ژمی څه باندې اته ویشت میلیون خلک د نړۍ خوراکي مرستو ته اړ دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن