کندهار (پژواک، ۲۲ سلواغه ۱۴۰۱): د کندهار ښار یوولسمې امنیتي حوزې اړوند د عینو مېنې په سیټا څلورلارې کې د امنیتي کسانو په ډزو کې یو ۱۵ کلن تنکی ځوان وژل شوی دی.
ځایي سرچېنې وایي، پېښه پرون (جمعه) شاوخوا ۱۲ بجې رامنځته شوې ده.
د یادې پېښې یوه عیني شاهد محمد انور پژواک خبري اژانس ته وویل: «د غرمې شاوخوا دوولس بجې وې، د عینو مېنې پر سیټا چوک تالاشي ته ولاړو امنیتي کسانو پر یوه موټرسایکل سپاره کس ته د درېدو وویل، خو هغه و نه درېد او دوی ټکان ورپسې وکړل، مرمۍ پر یوه بل ځوان ولګېدې او مړ شو.»
یوه دولتي سرچینه چې نه غواړي نوم یې یاد شي، پېښه تاییدوي او وايي چې د وژل شوي ځوان مړی روغتون ته وړل شوی او کورنۍ یې پيدا شوې ده.
دغې سرچینې پژواک خبري اژانس ته وویل: «هو، دغه ځوان پرون ویشتل شوی و، کورنۍ یې پيدا شوې خو نور معلومات نشته.»
Views: 264
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن