مزارشریف (پژواک، ۲۵ سلواغه، ۱۴۰۱) د بلخ امنیتي مسوولین وایي، چې د دغه ولایت امنیتي ځواکونو دوه کسان د انسان تښتوونکو له منګولو ژغورلي او په تړاو یې درې کسان نیولي.
د بلخ د امنیه قوماندانۍ د امنیت آمر قاري عبدالحی عابد د سلواغې په ۲۵مه، پژواک اژانس ته وویل، د نورالله او معراج الدین په نومونو دوه ځوانان تېره ورځ د درې انسان تښتوونکو له لوري تښتول شوي وو.
هغه زیاته کړه، دغه دوه ځوانان د امنیتي ځواکونو له تعقیب وروسته نن د انسان تښتوونکو له منګولو آزاد او خپلو کورنیو ته یې سپارلي دي.
عابد وایي، په دې تړاو یې درې کسان نیولي، نیول شویو کسانو په خپل جرم اعتراف کړی او دوسیې یې عدلي او قضایي ارګانونو ته سپارلي شوي دي.
په بلخ کې دوه ځوانان په داسې حال کې د انسان تښتوونکو له منګولو ژغورل کېږي، چې تېره ورځ په دغه ولایت کې یو ۷ کلن ماشوم هم تښتول شوی او تر دا مهاله یې برخلیک معلوم نه دی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن