ژبه

ایا له پژواک سره د ګډون حساب نه لرئ؟

د ګډون لپاره کښېکاږئ.

اروپا ته قاچاقي تلونکي ۱۸ افغانان یوه لارۍ کې مړه موندل شوي

اروپا ته قاچاقي تلونکي ۱۸ افغانان یوه لارۍ کې مړه موندل شوي

author avatar
18 Feb 2023 - 04:49
اروپا ته قاچاقي تلونکي ۱۸ افغانان یوه لارۍ کې مړه موندل شوي
author avatar
18 Feb 2023 - 04:49

اټلانټا (پژواک، ۲۹ سلواغه ۱۴۰۱): اروپا ته قاچاقي تلونکي ۱۸ افغانان د بلغاریا هېواد په مربوطاتو کې په یو لارۍ موټر کې مړه شوي دي.

د بلغاریای بي‌اېن‌ار راډیو د ځایي چارواکو په حواله خبر ورکړی چې په لاره کې ټول ۴۰ افغان کډوال سپاره وو چې له ډلې یې ۱۸ مړه شوي دي.

بلخوا فرانس پرېس خبري اژانس د بلغاریا کورنیو چارو وزارت له قوله لیکلي چې یاد موټر کې تر لرګیو لاندې شاوخوا ۴۰ کډوال په ناقانونه ډول لېږدول کېدل.

د راپورونو له مخې، دا په بلغاریا کې د انساني قاچاق یوه له خونړیو پېښو شمېرل کېږي. د بالکان دغه هېواد د خپلو پولو په اوږدو کې د ناقانونه تګ راتګ له زیاتېدو سره مخ دی.

سرچینو زیاته کړې، ځایي خلکو پولیسو ته خبر ورکړ، وروسته پولیسو د بلغاریا پلازمېنې صوفیا شمال ختیځ په ۲۰ کیلومترۍ کې د لوکورسکو کلي ته نږدې یوه لارۍ ومونده چې چلوونکی یې تښتېدلی و.

تر اوسه د دغو کډوالو  مړه کېدو لامل نه دی په ډاګه شوی خو د بلغاریا د روغتیا وزیر اسین میدجیدیف خبریالانو ته ویلي: «زه په ډاډ سره نه شم ویلای چې څه پېښ شوي؛ د اکسېجن کمښت موجود و، د دوی بدنونه ساړه او لانده وو او یقیناً دوی د څو ورځو لپاره څه نه وو خوړلي.»

هغه زياته کړه، په لارۍ کې ۱۴ کسان ژوندي موندل شوي چې د اتو کسانو روغتیایي حالت خراب و او روغتون ته وړل شوي دي.

میدجیدیف وویل، نور لس کسان په نږدې بوټو کې پټ وموندل شول او هغوی هم د معاینې لپاره روغتون ته یووړل شول.

بلغاریایي مقامات وایي، د هغو قاچاقبرانو موندلو لټه یې پیل کړې چې یاده لارۍ یې چلوله.

د اروپايي اتحادیې غړی هېواد بلغاریا چې اروپایي ټولنې ته د ننوتلو دروازې په توګه کارول کېږي، د خپل امنیت ټینګولو هڅه کوي چې له پولې یې د مخ په ډېرېدونکو کسانو تېرېدو مخه ونیسي.

دغه هېواد د خپل ۲۳۴ کیلومتره پولې کنټرول ډېر کړی او اغزن سیم پرې لګول شوی دی، د پولې زیاته برخه یې له ترکیې سره ده.

د بلغاریا د کورنیو چارو وزارت شمېرې ښیي چې سرحدي پولیسو په ۲۰۲۲ کې له سرحده د تېرېدو ۱۶۴ زره “غیر منظمې” هڅې شنډې کړې؛ دا غیرقانوني هڅې په ۲۰۲۱ کې ۵۵ زره وې.

د دې لپاره اتریش او هالنډ د شینګن په نوم د اروپایي ټولنې ترمنځ د پولې په ازاد زون کې د بلغاریا شاملېدو لپاره د صوفیا غوښتنه ځنډولې ده.

صوفیا له اروپايي اتحادیې د دوه میلیارد یورو غوښتنه کړې څو د پولې کنټرول پیاوړی او څارنه قوي کړي، خو بروکسل تر دې دمه د دغو پیسو له ورکولو انکار کړی دی.

Views: 204

اړیکه ونیسئ

د کیسې وړاندیز وکړئ

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

د پژواک اپلیکېشن

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.