اېټالیا کې د کډوالو کښتۍ ډوبېدو پېښه کې لږ تر لږه ۳۰ کسان مړه شوي

کابل (پژواک، ۷ کب ۱۴۰۱): اېټالیایي رسنیو خبر ورکړی چې د دغه هېواد په ختيځو سواحلو کې د یوې کښتۍ ډوبېدو پېښه کې لږ تر لږه ۳۰ کډوال مړه شوي دي.

د اېټالیا د انسای خبري اژانس د راپور له مخې، ۲۷ جسدونه د کروتو ولایت په «استکاتو ډي کورتو»‎ سواحلو او درې نور په اوبو کې موندل شوي دي.

اسوشېټډپرس خبري اژانس راپور ورکړی چې په دغه کښتۍ کې ۱۰۰ کډوال سپاره وو او نن (یکشنبه، د کب ۷مه) د اېټالیا په سواحلو کې ډوبه شوې ده.

دغه کښتۍ د سمندر‎ د څپو په پایله کې له یوې لویې ډبرې سره د لګېدو له امله ډوبه شوې چې د خپرو شوو معلوماتو له مخې، له دې پېښې ۴۰ کډوال ژغورل شوي دي.

تر اوسه معلومه نه ده چې په یاده کښتۍ کې ناست کسان د کومو هېوادونو وګړي دي؛ خو ځینو رسنیو خبر ورکړی چې د افغانستان، پاکستان او ایران کډوال پکې سپاره وو.

دا په داسې حال کې ده چې څو ورځې وړاندې د ۱۸ افغانانو جسدونه په بلغاریا کې هم موندل شوي وو.