استانبول کې د افغانستان قونسلګرۍ هم اسلامي امارت ته وسپارل شوه

کابل (پژواک، ۸ کب ۱۴۰۱): د بهرنيو چارو وزارت مسوولین وايي چې په استانبول کې د افغانستان قونسلګرۍ رسماً د اسلامي امارت استازي ته وسپارل شوه.

دغه مطلب د دغه وزارت د اسیایي څانګې رئیس ذاکر جلالي طلوع نيوز ته تأيید کړی دی.

ده زياته کړې، ګل مت خان ځدراڼ په استانبول کې د افغانستان نوی قونسل ټاکل شوی دی.

دا په داسې حال کې ده چې کابل تهران ته هم نوي ډیپلوماتان لېږلي دي.

د بهرنیو چارو وزارت نن اعلان وکړ چې له کابله ۷ ډيپلوماټان تهران ته ولاړل څو په دغه هېواد کې له نوي شارژدافیر فضل احمد حقاني سره یو ځای د افغانستان د سفارت چارې سمبال کړي.

یاد وزارت وايي، اسلامي امارت تر اوسه پاکستان، ترکمنستان، چین، قطر، ترکیې او روسیې ته خپل استازي استولې دي.