کابل (پژواک، ۱۷ کب ۱۴۰۱): په افغانستان کې د ایران سفیر دې ته په اشاره چې له سیمې بهر د افغانستان د ستونزو حل لپاره هڅې ښایي له شته وضعیت سره مرسته ونه کړي، زیاته کړه، د ټولګډون حکومت او د ښځو حقونو خوندیتوب پر لور د اسلامي امارت یو حرکت ښايي د سیمې هېوادونو له هرکلي سره مخ شي.
په تاشکند کې د افغانستان د ګاونډيو هېوادونو ځانګړو استازو له پرونۍ ناستې وروسته په افغانستان کې د ایران سفیر حسن کاظمي قُمي پرون شپه یوه ټوېټ کې لیکلي، یادې ناستې وښوده چې د افغانستان سیاسي، امنیتي او ټولنیز بدلون د سیمې لپاره مهم دی.
هغه دې ته په اشاره چې له سیمې بهر د حل لارو لپاره هڅې به له شته وضعیت سره کومه مرسته ونه کړي، زیاته کړه: «د افغانستان د ستونزو او مسایلو اساسي حللاره د سیمې هېوادونو ترمنځ په ژوره همکارۍ کې نغښتې ده.»
دغه راز د ایران سفیر ویلي چې د ټولګډون حکومت او د ښځو حقونو خوندیتوب پر لور د اسلامي امارت یو حرکت ښایي د سیمې هېوادونو له هرکلي سره مخ شي.
هغه په ډاګه کړې چې له ګانوډیو او سیمې له هېوادونو سره د اسلامي امارت ملتیا له کړکېچونو د وتلو ښه لار ده.
د یادونې ده، پرون د ازبکستان په کوربه توب په لومړي ځل د افغانستان د ګاونډیو هېوادونو ځانګړو استازو په تاشکند کې ناسته ترسره کړه.
د ازبکستان د بهرنیو چارو وزارت ویلي وو چې په دې ناسته کې به د افغانستان پر اوسني وضعیت، د افغانستان د ستونزو حل په برخه کې د سیمې هېوادونو د همکارۍ، د اوږدمهالې سولې او ثبات د ټینګښت او د افغانانو لپاره د بشري مرستو برابرولو په اړه خبرې وشي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن