کابل (پژواک، ۲۲ کب ۱۴۰۱): په افغانستان کې د ملګرو ملتونو د ماشومانو ملاتړ صندوق/ UNICEF وايي، نن په ټول هېواد کې د پولیو یا ګوزڼ مخنیوي واکسین کمپاین پیل شو چې څلور ورځې به دوام وکړي.
د واکسین دغه کمپاین داسې مهال پیلېږي چې د افغانستان په ختیځه حوزه کې د ۲۰۲۳ زېږدیز کال په پیل کې ۹ محیطي نمونې مثبتې شوې او د ویروس د سرایت اندېښنې یې ډېرې کړې دي.
په افغانستان کې د ملګرو ملتونو د ماشومانو ملاتړ صندوق مطبوعاتي مسوول کمالشاه سید پژواک خبري اژانس ته وویل، نن (د کب ۲۲مه) د هېواد په ۳۴ ولایتونو کې د پولیو واکسین کمپاین پیل شو.
دی وایي، د دغه څلور ورځني کمپاین په لړ کې به شاوخوا لس میلیون له پنځو کلونو کم عمره ماشومان واکسین شي څو د پولیو له ناروغۍ خوندي پاتې شي.
هغه زیاته کړه، په دغه کمپاین کې به هغو ماشومانو ته چې عمر یې له شپږو میاشتو تر پنځو کلونو پورې دی، د وټامین A څاڅکي هم ورکړل شي چې د بدن معافیت یې لوړ وساتل شي.
د ده په خبره، په افغانستان کې د پولیو د له منځه وړو پروګرام د عامې روغتیا وزارت تر چتر لاندې تطبیق کېږي او په دغو پروګرامونو کې د یونیسف عمده دنده په ټولنه کې د عامه پوهاوي زیاتول دي.
نوموړي وویل، د روان ۲۰۲۳ زېږدیز کال له پیله بیا تر اوسه په هېواد کې د پولیو کومه مثبته پېښه نه ده ثبت شوې خو د هېواد د ختیځې حوزې په چاپېریال کې یاد ویروس تثبیت شوی نو په همدغه اساس د دې ناروغۍ د خپرېدو ګواښ شته.
د ملګرو ملتونو د ماشومانو ملاتړ صندوق د افغانستان په څلورو ختیځو ولایتونو (ننګرهار، لغمان، کونړ او نورستان) کې د روانې کب میاشتې په لومړۍ هم د ګوزڼ مخنیوي یا پولیو واکسین کمپاین ترسره کړی و چې په پایله کې یې ۱.۲ میلیون له پنځو کلونو کم عمره ماشومان واکسین شوي وو.
چارواکي وايي، په تېر ۲۰۲۲ زېږدیز کال کې په ټول هېواد کې د پولیو واکسین نهه کمپاینونه شوي وو چې په پایله کې یې د ماشومانو د ګوزڼ پېښې ټیټې شوې دي.
په دغه کال کې د هېواد په کچه د ماشومانو د ګوزڼ یوازې دوه پېښې ثبت شوې چې یوه په پکتیکا او بله په کونړ ولایتونو کې وې.
Views: 51
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن