درېیو ولایتونو کې له سلګونو کورنیو سره نغدي، د خوراکي توکو او کیمیاوې سرې مرسته وشوه

کابل (پژواک، ۲۳ کب ۱۴۰۱): په فراه کې له ۳۴۵۷ اړو کورنیو سره د خوراکي توکو او نغدو پيسو مرستې لړۍ پيل شوه، په اروزګان کې له ۱۵۸۹ اړو کورنیو او ۱۵۸۸ کارګرو سره د خوراکي توکو مرسته وشوه او په لغمان کې بیا له ۴۰۰ بزګرانو سره د کیمياوي سرې مرسته وشوه.

د فراه په پشت‌رود او پشت‌کوه ولسوالیو کې نن له ۳۴۵۷ اړو کورنیو سره د خوراکي توکو او نغدو پيسو مرستې لړۍ پيل شوه.

د یاد ولایت د اطلاعاتو او فرهنګ رییس مولوي عبدالحی سباوون پژواک خبري اژانس ته وویل، نن په پشت‌رود ولسوالۍ کې د خوړو نړۍوال پروګرام/ WFP له خوا له ۲۵۲۰ اړو کورنیو سره د خوراکي توکو د مرستې لړۍ پيل شوه.

هغه زیاته کړه چې هرې کورنۍ ته ۵۰ کیلوګرامه اوړه، پنځه لېټره غوړي، ۶ کیلوګرامه دال او ۳۰ پاکټه د خوارځواکو ماشومانو او مېرمنو لپاره د تقویې خواړه ورکول کېږي.