عبدالحمید خراساني د پکتیا احمدابا ولسوالۍ ولسوال ټاکل شوی

کابل (پژواک، ۲۴ کب ۱۴۰۱): د پنجشېر ولایت د امنیت پخوانی امر عبدالحمید خراساني د پکتیا د احمدابا ولسوالۍ ولسوال په توګه ټاکل شوی دی.

د کورنیو چارو وزارت ویاند عبدالنافع ټکور نن پژواک خبري اژانس ته وویل چې خراسانی د احمدابا د ولسوال په توګه ټاکل شوی دی.

عبدالحمید خراساني هم ویلي چې راتلونکې اونۍ به د احمدابا د ولسوال په توګه خپله دنده پیل کړي.

خراساني د اسلامي امارت له واک ته رسېدو وروسته په پنجشیر ولایت کې د امنیت امر وټاکل شو خو څه موده وروسته له دندې ګوښه شو.