سرپل کې د نشه‌یي توکو د تولید یوه کارخونه له منځه یووړل شوه

سرپل (پژواک، ۸ وری ۱۴۰۲): د سرپل امنیتي سرچینې په دغه ولایت کې د نشه‌يي توکو تولید یوې کارخونې د کشف او له منځه وړلو خبر ورکوي.

د یاد ولایت د پولیسو ویاند دین‌محمد نظري پژواک خبري اژانس ته وویل، د نشه‌یي توکو پر وړاندې مبارزې ځواکونو تېره ورځ د کوهستاناتو ولسوالۍ په سنجګي کلي کې د نشه‌يي توکو د تولید یوه کارخونه کشف او له منځه وړې ده.

هغه زیاته کړه چې په یاده کارخونه کې یو کس هم نیول شوی او تر نظارت لاندې دی.

نوموړي وویل: «تېره ورځ د سرپل امنیه قوماندانۍ د نشه‌یي توکو پر وړاندې د مبارزې پولیسو د ښیښې نشه‌يي توکو پروسس یوه کارخونه کشف او له منځه وړې چې پکې ۱۵۰۰ کیلوګرام اومان بوټي چې د ښېښې نشه‌يي توکو په جوړولو کې ترې کار اخیستل کېږي هم شامل وو.»

دا په داسې حال کې ده چې درې ورځې واړندې هم د سرپل امنیه قوماندانۍ په صياد ولسوالۍ کې پر ۱۰۰ جریب ځمکه د کرل شوو کوکنارو اړولو خبر ورکړی و.