د روژې په رارسېدو سره هرات کې بې‌وزلې کورنۍ د خراب اقتصادي وضعیت له امله اندېښمنې دي

هرات ښار (پژواک، ۹ وری ۱۴۰۲): د روژې میاشتې له رارسېدو سره هم‌مهاله په هرات کې یو شمېر بې‌وزلې کورنۍ د خراب اقتصادي وضعیت، د لومړنیو توکو بیو لوړېدو او بېکارۍ په اړه اندېښنه څرګندوي.

د هرات ولایت دغه اوسېدونکي له سرپرست حکومته غواړي چې د یادو ستونزو د هواري په برخه کې لازمه همکاري وکړي.

د هرات ولایت د شیداني سیمې اوسېدونکی شاه‌ولي -چې له څو کلونو راهیسې له بادغیس ولایته هرات ته کډه شوی- وايي، اقتصادي وضعیت یې ډېر خراب دی چې دا مهال د یوې بوجۍ اوړو اخیستلو توان نه لري.

هغه له پژواک سره په خبرو کې وویل، په تېرو څو ورځو کې له ډېرو هڅو سره سره نه دی توانېدلی چې ان یوه ورځ کار پیدا کړي.

نوموړي زیاته کړه، بېکاره دی او د ۱۰ کسیزې کورنۍ سرپرستي ور له غاړې ده، د روژې په راتلو سره نه پوهېږې چې دا میاشت څه ډول تېره کړي.

هغه څرګنده کړه چې په روژه کې د خوراکي توکو بیې لوړې شوې او حکومت باید له بې‌وزلو او هغو کسانو سره چې د ژوند ورځنۍ اړتیاوې نه شي پوره کولی، مرسته وکړي.

بل‌خوا، د هرات بل اوسېدونکي ۶۵ کلن محمدایوب هم پژواک ته وویل چې د ۷ کسیزې کورنۍ سرپرست او دا مهال د ناروغۍ درلودو ترڅنګ یې اقتصادي وضعیت هم ډېر خراب دی.

د هغه په خبره، د روژې په راتلو سره نه پوهېږې چې دا میاشت څه ډول تېره کړي، په داسې حال کې چې اوس څه باندې ۲۵زره افغانۍ له هټۍوالو پوروړی دی او د بېرته ورکړې توان نه لري.

په ورته مهال، ۵۸ کلنه بي‌بي‌ګل هم د یوې بې‌وزلې کورنۍ سرپرسته ده چې دوه زامن یې د مزدورۍ لپاره ایران او پاکستان ته تللي دي.

هغه په داسې حال کې چې لمسیان یې ترڅنګ ناست وو له پژواک سره په خبرو کې وویل، د کورنۍ اقتصادي وضعیت یې خراب دی او زامن یې د میاشتې یوازې درې زره افغانۍ چې د مزدورۍ له لارې یې پیدا کوي، دوی ته یې رالېږي او د ۲۶ کسیزې کورنۍ لپاره یې لګوي.

نوموړې چې بېوزلي یې په څېره کې له ورایه ښکاري زیاته کړه، تر اوسه یې د حکومت یا موسسو له لوري کومه مرسته نه ده ترلاسه کړې او دا مهال چې د روژې میاشت ده، کورنۍ یې د ځینو لومړنیو توکو پېرلو ته هېڅ تیاری هم نه لري.

په همدې حال کې، د لومړنیو توکو یو شمېر پلورونکي د ځینو سوداګرو له احتکار او په بهرنیو بازارونو کې له لوړو بیو شکایت کوي.

په هرات ښار کې یوه هټۍوال محمدمحسن له پژواک سره په خبرو کې وویل، د لومړنیو توکو بیې بې‌سارې لوړې شوې او دغه کار د سوداګرو له لوري د بازار له کنټرول سره تړاو لري.

هغه څرګنده کړه چې د خوراکي توکو یوه پلورونکي په توګه د کورنیو اقتصادي وضعیت خراب ګڼي؛ خو که سوداګر توکي په ارزانه بیه دوی ته ورکړي، دوی به یې هم په ټيټه بیه وپلوري.

په هرات ښار کې یو بل هټۍوال غیب‌الله هم وايي، د توکو بیې لوړې شوې دي او د پلور کچه یې کمه شوې ده.

هغه له حکومته غواړي چې د بیو ټيټولو لپاره یو مشخص مېکانېزم جوړ کړي.

په ورته مهال، د هرات ولایت د اطلاعاتو او فرهنګ رییس نعیم‌الحق حقاني وايي، د دغه ولایت سیمه‌ییزې ادارې د سرې میاشتې، کډوالو او پېښو پر وړاندې د مبارزې ادارو له لارې یو منظم پلان جوړ کړی څو د ټولنې بې‌وزله وګړو ته لا ډېرې مرستې راجلبې کړي.