کابل (پژواک، ۲۱ وری ۱۴۰۲): د لوړو زدهکړو وزارت وایي، د پوهنتون د استادانو میاشتنۍ تنخواګانې علمي رتبو ته په پام له ۳۶ تر ۵۴ سلنې لوړې شوې دي.
د لوړو زدهکړو وزارت د یادو څرګندو ترڅنګ په خپله ټوېټرپاڼه کې لیکلي چې د پوهاند علمي رتبې تنخوا له ۳۹ زره څخه ۶۰ زره افغانیو ته، د پوهنوال علمي رتبې تنخوا له ۳۳ زره څخه ۴۵ زره افغانیو ته، د پوهندوی عملي رتبې تنخوا له ۲۷ زره څخه ۳۸ زره افغانیو ته، د پوهنمل علمي رتبې تنخوا له ۲۱ زره څخه ۳۰ زره افغانیو ته، د پوهنیار علمي رتبې تنخوا له ۱۸ زره څخه ۲۵ زره افغانیو ته، د نوماند پوهنیار عملي رتبې تنخوا له ۱۳۵۰۰ څخه ۲۰ زره افغانیو ته لوړې شوې دي.
د لوړو زدهکړو وزارت لیکلي چې دغه تنخواګانې د علمي رتبو دي او هر استاد ته د خپل بست تنخوا هم ورکول کېږي.
د لوړو زدهکړو وزارت د معلوماتو له مخې، دغه معاشونه له روانې وري میاشتې څخه د اجرا وړ دي.
پژواک خبري اژانس د ۱۴۰۱ کال په وري میاشت کې راپور خپور کړ چې د دولتي پوهنتونونو ځیني استادان وایي، څو میاشتې مخکې یې تنخواګانې او امتیازونه نږدې ۳۸ سلنه کم شوي؛ خو د توکو بیو لوړېدو او د دوی کاري مکلفیتونو زیاتوالي ته په پام باید بېرته لوړې شي.
Views: 2895
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن