کابل (پژواک، ۱۱ غویی ۱۴۰۲): نن په دوحه کې د افغانستان په اړه د ملګرو ملتونو سرمنشي انټونیو ګوټرېش په مشرۍ غونډه جوړیږي چې د ۲۵ هېوادونو او نړۍوالو سازمانونو استازي به په کې برخه ولري.
شاوخوا دیارلس ورځې مخکې د ملګرو ملتونو د سرمنشي مرستیالې امنه محمد د امریکا متحده ایالتونو په پرنسټن پوهنتون کې په یوه سیمینار کې د افغانستان له سرپرست حکومت سره د خبرو پر اړتیا ټینګار وکړ او ويې ویل، د ملګرو ملتونو سازمان په راتلونکو ورځو کې د دغه حکومت د رسمیت پېژندلو په اړه په دوحه کې د کنفرانس پر جوړولو غور کوي.
له دې څرګندونو وروسته، د ملګرو ملتونو د ویاند مرستیال فرحانالحق وویل، دا غونډه د سرپرست حکومت د رسمیت پېژندلو لپاره نه ده او په افغانستان کې د ستونزو حل لپاره د یوې اجماع پر رامنځته کولو تمرکز کوي.
د روانې غویي میاشتې په اتمه په افغانستان کې د ملګرو ملتونو د دفتر (یوناما) مرستیال مارکس پوټزل د ریاستالوزراء له اداري مرستیال مولوي عبدالسلام حنفي سره په لیدنه کې ویلي چې په دې غونډه کې د ۲۲ هېوادونو او د دوو نړۍوالو سازمانونو استازي په کې ګډون کوي.
حنفي هم ویلی وو، هیله لري د دوحې غونډې ګډونوال د اسلامي امارت مثبتو او مهمو کړنو ته په پام اغېزناکې او مثبتې پرېکړې وکړي.
ملګرو ملتونو په داسې حال کې د افغانستان سرپرست حکومت ته په دغه کنفرانس کې د ګډون بلنه نه ده ورکړې چې د امریکا مخکني ځانګړي استازي زلمي خلیلزاد څو ورځې مخکې ویلي وو چې د دغه کنفرانس په څنډه کې باید د افغان سرپرست حکومت له چارواکو سره هم ځانګړې ناستې وشي.
Views: 180
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن