لښکرګاه (پژواک، ۱۲ غویی ۱۴۰۲): د هلمند مسوولین وايي، د دغه ولایت په کجکي ولسوالۍ کې د سراچې موټر د چپه کېدو په پېښه کې د یوې کورنۍ دوه غړي مړه شوي او ۷ نور ټپيان دي.
د یاد ولایت د اطلاعاتو او فرهنګ ریاست مرستيال مولوي محمد قاسم ریاض نن (سه شنبه) پژواک خبري اژانس ته وویل چې یاده پېښه تېره ورځ غرمه مهال د کجکي ولسوالۍ په مربوطاتو کې رامنځ ته شوې ده.
ده زیاته کړه، تېره ورځ یو سراچه موټر چې د یوې کورنۍ ۹ تنه په کې سپاره وو، کجکي ولسوالۍ کې پرې موټر چپه شوی چې یو تن لوی نارینه او بل ماشوم په کې مړه شوي او ۷ تنه چې ښځې او ماشومان په کې شامل دي، تپیان شوي دي .
د هغه په وینا، ټپیان د کجکي ولسوالۍ مرکزي روغتون ته د مسوولینو له خوا انتقال شوي او هلته تر درملنې لاندې دي .
په ددې وروستیو کې د هېواد په څو ولایتونو کې ترافیکي پېښي زیاتې شوي چې خلک یې لوی لامل د موټر چلوونکو بې اختیاطۍ ښيي .
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن