کابل (پژواک، ۲۶ غویی ۱۴۰۲): د بشر حقونو څار سازمان وایي، د افغانستان د ټولنې دوه پر درې برخه وګړي له سخت غذایي ناامنۍ سره مخ دي او له دې ډلې، ۸۷۵ زره ماشومان له سختې خوارځواکۍ رنځېږي.
د بشر حقونو څار سازمان په یوه تازه راپور کې ویلي چې په افغانستان کې خورا ناوړه بشري ناورین جریان لري او دغه ناورین د دغه هېواد ډېری ښځې او نجونې زیانمنې کړې دي.
دغهراز یاد بنسټ ویلي چې د افغانستان د سرپرست حکومت له خوا محدودیتونو او له دې ډلې د ملګرو ملتونو په دفترونو او نادولتي ادارو کې د ښځو د کار بندیز، ستونزه ډېره کړې ده.
د بشر حقونو څار سازمان ټینګار کړی، اړینه ده چې د خوړو نړۍوال سازمان او یونیسف په ګډون کلیدي سازمانونه د دغو سیاستونو پر وړاندې ثابت دریځ ولري او د حیاتي مرستو وړاندې کولو لپاره لا ډېرې هڅې وکړي.
د بشر حقونو څار ادارې دې ته په اشارې سره چې «افغانستان تر ډېره د رسنیو له پامه لوېدلی» زیاته کړې، په دغه هېواد کې شته ناورین، دوه حیاتي مسوولیتونه (اړمنو ته د مرستو رسول او همداراز د بشري حقونو نقضولو پای ته رسولو لپاره پر «طالبانو» فشار راوړل) خو په ورته وخت کې ناسازګار مسوولیتونه یې د ملګرو ملتونو پر غاړه اچولي دي.
یاد بنسټ خبرداری ورکړی چې د مرستو له لاسه ورکول د افغانستان ډېری خلک به لا بېوزلي او وږي کړي.
ومو غوښتل چې د یاد راپور په اړه د اسلامي امارت نظر ولرو، خو پر دې چارې بریالي نه شو.
خو د ملګرو ملتونو د سرمنشي له څرګندونو مخکې د مالیې وزارت دا خبرې رد کړې وې چې افغانستان له اقتصادي بحران او د بېوزلۍ له ډېرېدو سره مخ دی او ویلي وو چې د اسلامي امارت له بیا واکمنېدو سره مثبت او د افغانستان د خلکو په اقتصادي وضعیت کې د پام وړ مثبت تغییرات راغلي دي.
دغه راز د اسلامي امارت مسوولینو ویلي چې په افغانستان کې اوس تر بل هر وخت بشري حقونه رعایت کېږي.
Views: 74
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن