پروان کې د ترافیکي پېښې له امله څلور کسانو ته مرګ‌ژوبله اوښتې

کابل (پژواک، ۴ غبرګولی ۱۴۰۲): د پروان ولایت د سالنګ ولسوالۍ اړوند په اولنګ سیمه کې د ترافیکي پېښې له امله یوه ښځه مړه شوې او درې کسان نور ټپیان شوي دي.

د پروان امنیې قوماندانۍ له خوا په خپره شوې خبرپاڼه کې راغلي: «یو کرولا ډوله موټر له شمال څخه د جنوب پر لوري د حرکت په حال کې و چې د سالنګ ولسوالۍ د اولنګ په سیمه کې د تخنیکي ستونزو له امله د یو باروړونکي له سکرو بار موټر سره چې له شمال څخه د جنوب پر لوري د حرکت په حال کې و، ترافیکي پېښه کړې ده، په پایله کې یې یوې ښځې خپل ژوند له لاسه ورکړی او د موټرچلوونکي په شمول درې تنه نور ژوبل شوي دي.»

په خبرپاڼه کې راغلي، د پېښې قربانیان د جوزجان ولایت اوسېدونکي دي او د ځایي مسؤولینو په همکارۍ د پروان ملکي روغتون ته لېږدول شوي دي.