جوزجان کې د ترافیکي پېښې له امله درېیو کسانو ته مرګ‌ژوبله اوښتې

شبرغان (پژواک، ۵ غبرګولی ۱۴۰۲): د شبرغان – مزارشریف پر لویه‌لار د یوې ترافیکي پېښې له امله یو کس مړ او دوه نور ټپيان شوي دي.

د جوزجان د پولیسو ویاند قاري عبدالستار حلیمي پژواک اژانس ته وویل، د شبرغان – مزارشریف پر لویه‌لار د فیض‌اباد ولسوالۍ په «سه‌ درخت» سیمه کې د دوو باروړونکو موټرو د ټکر په پایله کې یو موټرچلوونکی مړ شوی او دوه نور کسان ټپیان دي.

د حلیمي په وینا، یاده پېښه تېره شپه شاوخوا یوه بجه د موټرچلوونکو د بې‌احتیاطۍ له امله شوې ده.

هغه زیاته کړه، د پېښې ټپیان د درملنې لپاره د جوزجان ولایت ۲۰۰ بستریز روغتون ته لېږدول شوي چې روغتیايي وضعیت یې د ډاډ وړ ښودل شوی دی.