ندیم: د اسلامي امارت د ګومارنو معیار تقوا، دینداري او اهلیت دی نه قومیت

کابل (پژواک، ۱۲ غبرګولی ۱۴۰۲): د لوړو زده‌‎کړو سرپرست وزیر ویلي چې کار اهل کار ته سپاري او په ګومارنو کې د اړیکو او خپلوۍ پر ځای وړتیا یا اهلیت ته ترجیح ورکوي.

د لوړو زده‌کړو وزارت سرپرست ندامحمد ندیم په یوه تصویري ویډیو کې وایي: «کار د کار اهل ته سپارو او د خپلوۍ پر ځای اهلیت ته ترجیح ورکوو.»

هغه زیاته کړې، د اسلامي امارت پالیسۍ له مخې، د ګومارنو یوازېنۍ او تر ټولو ښه معیار تقوا، دینداري او وړتیا ده نه خپلوي.

ندیم دغه راز ویلي: «هزار خویش که بیگانه از خدا باشد، فدای یک تن بیگانه که آشنا باشد؛ دا زموږ لار او زموږ تګلاره ده.»

نوموړي څرګنده کړه، که څوک په نظام کې ځان ته تشکیل جوړوي او خپل ورور یا خپلوان تشکلیاتو ته راولي، د امارت په پالیسۍ کې نشته او اسلامي امارت یې نه تاییدوي، بلکې اسلامي امارت وړتیا ته ترجیح ورکوي.