د ۱۴۰۲ مالي کال بودجه توشیح شوه

کابل (پژواک، ۱۳ غبرګولی ۱۴۰۲): د نوي مالي کال له پیله د څه باندې دوو میاشتو له تېرېدو وروسته، د افغانستان سرپرست حکومت د ۱۴۰۲ مالي کال بودجه توشیح کړه.

کابینې د ۱۴۰۲ مالي کال بودجې سند د ۱۴۰۱ کال د حوت میاشتې په نهمه تایید او مالیې وزارت ته استولی و څو په دې اړه لازم اقدامات ترسره کړي.

د اسلامي امارت ویاند ذبیح‌الله مجاهد په دې اړه رسنیو ته ویلي: «بودجه لږ وځنډېده، یوه‌نیمه میاشت د دې لپاره چې په تشکیلاتو باندې کار کېده، باید نهایي شوی وای او وروسته د تشکیل له مخې د بودجې په اړه تصمیم نیول کېده خو له نېکه‌مرغه درې څلور ورځې مخکې بودجه تصویب شوه.»

هغه د بودجې د څرنګوالي په اړه معلومات ور نه کړل.

د یادونې ده، د تېر مالي کال بودجه ۲۳۱ میلیارد افغانۍ ټاکل شوې وه چې ۲۰۳ میلیارد افغانۍ یې عادي بودجه او ۲۷٫۹ میلیارد افغانۍ یې پراختیایي بودجه وه.