بدخشان کې د ترافیکي پېښې له امله درې کسان مړه شوي

فیض‌اباد (پژواک، ۲۰ غبرګولی ۱۴۰۲): بدخشان کې ځايي مسوولین وایي چې د دغه ولایت په کوف‌اب ولسوالۍ کې د ترافیکې پېښې له امله درې کسان مړه شوي دي.

د بدخشان امنیې قوماندانۍ ویاند احسان‌الله کامګار پژواک خبري اژانس ته وویل چې دا پېښه نن له غرمې مخکې د دغه ولایت د کوف‌‌اب ولسوالۍ د نشر کلي ساحه کې شوې ده.

هغه زیاته کړه، یو ډا‌ډسن ډوله موټر د یادې ولسوالۍ په نشر کلي کې له سړکه وتلی او چپه شوی چې پایله کې یې درې کسان مړه شوي دي.

د هغه په وینا، مړه شوي یو د جوزجان او بل د کابل ولایتونو اوسېدونکي دي.

هغه زیاتوي، د یادو کسانو جسدونه د ځایي خلکو په همکارۍ د یادې ولسوالۍ امنیې قوماندانۍ منسوبینو له لوري د دې ولسوالۍ روغتیایي کلینیک ته لېږدول شوي دي.

خو هغه د یادې پېښې د لامل په اړه څه ونه ویل.

د یادونې ده، د تېرې اونۍ په وروستیو کې په سرپل او زابل ولایتونو کې په دوو ترافیکي پېښو کې لسګونو کسانو ته مرګ ژوبله واوښته.