هرات (پژواک، ۲۲ غبرګولی ۱۴۰۲): په داسې حال کې چې د زړو افغاني بانکنوټونو شتوالي د هرات په بازارونو کې د راکړې ورکړې بهیر له ستونزو سره مخ کړی و، په دې وروستيو کې سيمهييزې ادارې په دغه ولايت کې د ١٠ او ٢٠ بانکنوټونه بدلولو لړۍ پیل کړې ده.
په هرات کې د زړو بانکنوټونو د تبادلې بهير پيلېدل د دغه ولايت د اوسېدونکو او صرافانو له خوا هرکلي سره مخ شوى او له ټولو خلکو غواړي چې د پيسو د ساتنې په برخه کې پوره هڅې وکړي.
د هرات يو اوسېدونکى سيفالله له پژواک خبري اژانس سره په خبرو کې وايي، په دغه اقدام سره به تر ډېره بريده د دوى ستونزې هوارې شي؛ ځکه چې په بازار کې د زړو بانکنوټونو شتون د راکړې ورکړې په برخه کې جدي ستونزې رامنځته کړې وې او اوس له بازاره یې په راټولولو سره به د خلکو ستونزې تر يوه حده کمې شي.
هغه له حکومته غواړي چې د هېواد بازارونو ته د نورو بانکنوټونو واردولو برخه کې هم اقدام وکړي؛ ځکه د ۵۰ او ۱۰۰ افغاني بانکنوټونو وضعیت هم د اندېښنې وړ دی او په ډېرو مواردو کې د پېرېدونکي او پلورونکي ترمنځ ستونزې رامنځته کېږي.
په همدې حال کې، د هرات يو بل اوسېدونکى فيضالله عليزايي هم په دې باور دى چې د زړو پيسو شتون يوه لويه ټولنيزه ستونزه ګرځېدلې ده؛ ځکه بانکنوټونه خورا زاړه شوي دي او په راکړه ورکړه کې یې خلک له ستونزو سره مخ کړي دي.
هغه د سيمهييزې ادارې او مرکزي بانک له دغه اقدامه خوښي څرګنده کړه او ویې ویل: «اوس دا زموږ دنده ده چې پيسې په سم ډول وساتو.»
بلخوا، د یاد ولايت صرافان هم د نويو بانکنوټونو د وېش او له بازاره د زړو هغو راټولولو په برخه کې د افغانستان بانک له کړنو څخه خوښي څرګندوي.
په هرات کې یو شمېر صرافان وايي، د زړو بانکنوټونو شتون سوداګریز معاملات له ستونزو سره مخ کړي وو، اوس به د زړو بانکنوټونو پر ځای د نویو په راوړلو سره په دې برخه کې د دوی ډېرې ستونزې هوارې شي.
د دغه ولايت یو صراف ناصر احمدي له پژواک خبري اژانس سره په خبرو کې وويل، د لسو او شلو افغانيو بانکنوټونه په بشپړ ډول له چلښته لویدلي وو او د حکومت له دغه اقدام سره به سوداګريز بازار ته يو ډول انرژي ورکړل شي.
هغه له حکومتي مسوولینو غواړي چې د هېواد بازارونو ته له لسګون اوشلګون پورته بانکنوټونه هم توزیع کړي؛ ځکه چې له څو کلونو راهیسې غټ بانکنوټونه بازار ته نه دي راغلي.
په همدې حال کې، د هرات د والي وياند مولوي نثاراحمد الياس پژواک ته وويل چې د دغه ولايت دولتي او خصوصي بانکونو ته د ١٠ او ٢٠ افغاني بانکنوټونو د وېش لړۍ پيل شوې ده.
الیاس زیاته کړه، هغه کسان چې په خپلو کورونو، هټیو او صرافیو کې د ۱۰ او ۲۰ زاړه افغاني بانکنوټونه لري، کولای شي چې بانک ته د مراجعې له لارې خپل دغه بانکنوټونه بدل کړي.
خو پوهان ټینګار کوي چې د نوو بانکنوټونو پر چاپولو ډېر لګښت راځي، نو ځکه باید خلک هم د بانکنوټونو د خرابېدو په مخنیوي کې له دولت سره همکاري وکړي.
دا په داسې حال کې ده چې تېره اونۍ د افغانستان بانک د یوې اطلاعیې په خپرولو سره د ۱۰ او ۲۰ زړو افغاني بانکنوټونو د تبادلې د پیل اعلان وکړ او له هېوادوالو یې وغوښتل چې تر ۱۰ زره افغانۍ بانک ته یوسي او له کمېشن پرته یې تبادله کړي.
غړيYou need to subscribe to view the full article. Please login or register a new account.
