<p style="text-align: justify;">کابل (پژواک، ۳ چنګاښ ۱۴۰۲): د افغانستان اوسپنې پټلۍ اداره وايي، په تېره غبرګولي میاشت کې د اوسپنې پټلۍ له لارې څه باندې ۲۵۷ زره ټنه توکي هېواد ته وارد او ۶۰۷ ټنه توکي صادر شوي دي.</p>
<p style="text-align: justify;">د یادې ادارې په خبرپاڼه کې راغلي، د روان کال په تېره غبرګولی میاشتې کې د حیرتان اوسپنې پټلۍ له لارې ۱۸۵ زره او ۳۲۲ ټنه، د اقینې اوسپنۍ پټلۍ له لارې ۳۸ زره او ۵۴۳ ټنه او د تورغونډۍ اوسپنې پټلۍ له لارې ۳۳ زره او ۷۷۰ ټنه توکي- چې ټولیز وزن یې ۲۵۷ زره او۶۳۵ ټنه کېږي- هېواد ته وارد شوي دي.</p>
<p style="text-align: justify;">یاده اداره وايي، په غبرګولي میاشت کې ۶۰۷ ټنه توکي له یادو لارو بهرنیو هېوادونو ته صادر شوي چې لویه برخه یې وچه مېوه وه.</p>
<p style="text-align: justify;">د اوسپنې پټلۍ ادارې ویاند عبدالسمیع دراني پژواک خبري اژانس ته وویل، په وارد شوو توکو کې غنم، اوړه، حبوبات، تېل، اوبلن ګاز، غوړي او نور شامل دي چې له قزاقستان، ازبکستان، ترکمنستان، روسیې او چین څخه وارد شوي دي.</p>
<p style="text-align: justify;">د هغه په وينا، د صادرو شوو توکو ډېره برخه ممیز دي چې روسیې، قزاقستان، ازبکستان او قرغیزستان ته صادر شوي دي.</p>
<p style="text-align: justify;">د دراني د معلوماتو له مخې، په یاده موده کې د اوسپنې پټلۍ له لارې ۳۷۶۷ ټنه ترانزیټ شوی چې ډېره برخه یې وریجې دي او د جنوبي اسیا له هېوادونو د منځنۍ اسیا هېوادونو ته صادر شوې دي.</p>
<p style="text-align: justify;">د اوسپنې پټلۍ اداره وايي، هڅه کوي د توکو د لا ډېر لېږد رالېږد په موخه سوداګرو ته اسانتیاوې برابرې کړي.</p>
<p style="text-align: justify;">د یادې ادارې معلوماتو له مخې، د روان ۱۴۰۲ لمریز کال په غویي میاشت کې د اوسپنې پټلۍ له لارې په ټوله کې ۴۳۰ زره او ۶۶۵ ټنه توکي وارد او صادر شوي دي.</p>
