جلالاباد (پژواک، ۲۴ چنګاښ ۱۴۰۲): د ننګرهار په مرکز جلالاباد ښار کې د ترافيکي پېښې له امله يو کس مړ او څلور نور ټپيان شوي دي.
مسوولين وايي، ټکر د موټرسايکل او رېکشې ترمنځ شوی دی.
د ننګرهار امنيې قوماندانۍ وياند عبدالبصير زابلي د چنګاښ په ۲۴مه پژواک خبري اژانس ته وويل، پرون مازديګر د جلالاباد ښار اوومې ناحيې اړوند د سرخاب پله سيمه کې د يوه موټرسايکل او رېکشې ترمنځ ټکر شوى دى.
هغه وايي چې په پېښه کې موټرسايکلچلوونکی ځای پر ځای مړ شوی او په رېکشه کې سپاره څلور کسان ټپيان شوي دي.
د پېښې يوه عيني شاهد ميرويس پژواک ته وويل، پېښه د چلوونکو د ګړندي تګ له امله وشوه.
هغه زياته کړه، ټپيان او مړی د ځايي امنيتي مسوولينو له لوري روغتون ته لېږدول شوي دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن