لس ټانکره بې‌کیفیته ګاز له تورغوندۍ بندره بېرته ترکمنستان ته ګرځول شوی

کابل (پژواک، ۲۵ چنګاښ ۱۴۰۲): د افغانستان سټنډرډ ملي اداره وايي، له ترکمنستانه وارد شوی لس ټانکره بې‌کیفیته ګاز یې د هرات له تورغوندۍ بندره بېرته یاد هېواد ته ګرځولی دی.

د سټنډرډ ملي ادارې پر خپله ټويټرپاڼه ليکلي چې دغه ګاز پرون د یاد بندر له لارې افغانستان ته راوړل کېده.

سرچينه زياتوي، د بې‌کیفیته ګاز وارداتو مخنیوي لپاره په جدیت سره عملي ګامونه پورته کوي.

د یادونې ده، یادې ادارې د روانې چنګاښ میاشتې په ۱۹مه هم ۱۷ ټانکره بې‌کیفیته ګاز ترکمنستان ته ګرځولی و.

دغه راز یادې ادارې څو ځلې بې‌کیفیته تېل هم له بندرونو بېرته اړوندو هېوادونو ته ګرځولي دي.