کابل (پژواک، ۲۸ چنګاښ ۱۴۰۲): یو شمېر ښځو نن په کابل ښار کې د ښځینه سینګارتونونو تړل کېدو په غبرګون کې اعتراضي لاریون وکړ خو د امنیتي کسانو له لوري یې د دوام مخه ونیول شوه.
[restrict paid=”true”]
د امر بالمعروف، نهي عنالمنکر او شکایتونو اورېدو وزارت د روانې چنګاښ میاشتې په پنځمه د یوه مکتوب په خپرولو سره وویل چې د راتلونکې زمري میاشتې له درېیمې نېټې وروسته د ښځینه سینګارتونونو فعالیت منع دی او جوازونه یې د اعتبار وړ نه دي.
یو شمېر ښځو نن د کابل ښار په شهرنو سیمه کې دغه بندیز ته په غبرګون کې لاریون وکړ.
یوه سرچینه چې نه غواړي نوم یې څرګند شي، پژواک خبري اژانس ته وویل چې دغه مېرمنې د شهرنو، بختاور ټاور کوڅه کې راټولې شوې وې او د امنیتي خواکونو له لوري د لاریون د دوام اجازه نه ورکول کېده، هوایي ډزې کېدې او د لاریون د دوام مخنیوي لپاره یې پرې اوبه شیندلې.
په ټولنیزو پاڼو کې هم داسې ویډیوګانې چې ښکاري د ننني لاریون دي، خپرې شوې دي.
په خپرو شوو ویډیوګانو کې د لاریونوالو شمېر تر دېرشو ډېر ښکاري، په سيمه کې د هوایي ډزو غږونه هم اورېدل کېږي او د امنیتي کسانو له لوري پر لاریونوالو اوبه پاشل کېږي.
په دغو ويډیوګانو کې یادې ښځې د «عدالت عدالت» شعارونه ورکوي.
[/restrict]
Views: 118
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن