تالقان (پژواک، ۱۲ زمری ۱۴۰۲): د تخار ځیني اوسېدونکي د اندېښنې په څرګندولو وایي چې ژوبین لرغونې کلا چې سلګونه کاله مخینه لري، اوس د موسمي سېلابونو او غیرقانوني کیندنو په نتیجه کې د له منځه تلو په حال کې ده.
د سیمې یوه اوسېدونکي مولوي سید محسن پژواک ته وویل، ژوبین کلا د یاد ولایت یوه لرغونې او تاریخي کلا ده چې شاوخوا زر کاله مخینه لري.
نوموړي زیاته کړه: «پخوا د دې کلا د تصرف کولو په موخه په ځلونو بریدونه شوي او د دغې کلا پر سر د جګړو پایله کې د زرګونو کسانو وینې توی شوي، خو د حکومتونو د بېغورۍ له امله پر یوه کنډواله بدله شوې او د له منځه تلو په حال کې ده.»
دغه دیني عالم زیاتوي چې که دغه سیمه په نورو ګاونډيو هېوادونو کې وای، د ګرځندویۍ پر یوه لوی مرکز به بدله شوې وای او له تخریبېدو به یې مخنیوی کېده، خو دلته پر کنډواله بدله شوې ده.
هغه له حکومته د یادې کلا د محافظتي دېوالونو جوړولو غوښتنه وکړه او ویې ویل چې د دغې کلا دغیرقانوني کیندنې مخنیوی دې هم وشي.
د ځایي مسوولینو او اوسېدونکو د معلوماتو له مخې، ژوبین کلا د تخار اطلاعاتو او فرهنګ ریاست کې د یوې تاریخي کلا په توګه ثبت ده چې د تالقان ښار په درې کیلومترۍ کې موقعیت لري، د چینې، سیند، او شنې فضا په درلودو سره د ورځې لسګونه کسان د دې کلا لیدو ته راځي.
د هغوی په خبره، دغه لرغونې سیمه د حکومتونو د بېغورۍ، د موسمي سېلابونو، د «شهر روان» سیند اوبو راوتلو او د غیرقانوني کیندنې له امله د له منځه تلو له ګواښ سره مخه ده چې د سیمې خلک یې اندېښمن کړي دي.
د سیمې یو بل اوسېدونکی اغا سید امرالدین وایي: «دا سیمه د له منځه تلو په حال کې ده، هيڅوک ورته پاملرنه نه کوي، د نه پاملرنې له امله د یادې کلا یوه لویه برخه تخریب او له منځه تللې، دغه تاریخي سیمه یوه له شنو سیمو ده چې باید د حکومت له خوا ورته پاملرنه وشي او د هغه له تخریبه مخنیوی وشي.»
د سیمې یوه بل اوسېدونکي تیمورشاه هم دغه کلا یوه تاریخي کلا وبلله او ټينګار یې وکړ، که چیرې د یادې کلا په سویل برخه کې د شهر روان سیند اوبو له امله د دې کلا د تخریبېدو مخه و نه نیول شي او په دې برخه کې استنادي دېوالونه جوړ نه شي، په نږدې راتلوونکي کې به د دې تاریخي کلا د ړنګېدو شاهدان وو.
په ورته وخت کې د تخار د اطلاعاتو او فرهنګ ریاست د ګرځندوی امر نورالدین قلیچ بیک که څه مني چې دا سیمه د له منځه تلو په حال کې ده خو وایي، د دې کلا د تخریبېدو د مخنیوي په موخه د هغه د محافظتي دېوالونو جوړېدو څو وړاندیزونه اطلاعاتو او کلتور وزارت ته لېږل شوي دي.
نوموړي زیاته کړه چې دغه راز د دې سیمې د غیرقانوني کيندنې د مخنیوي په موخه هم هڅې روانې دي.
Views: 63
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن