فراه (پژواک، ۱۶ زمری ۱۴۰۲): د فراه عامې روغتیا ریاست وايي، د دغه ولایت په ګلستان ولسوالۍ کې د درېیو سیمو شاوخوا لس زره کورنۍ روغتيايي خدماتو ته لاسرسی نه لري خو زیاتوي، هڅې روانې دي چې له روغتيايي خدماتو محرومو ټولو سیمو کې نوي روغتيايي مرکزونه جوړ شي.
د دغه ولایت د عامې روغتیا ریاست مرستیال ملا عبدالحق دینمحمد پژواک خبري اژانس ته وویل، د ګلستان ولسوالۍ په سیداهو، جوکه او لامان سیمو کې شاوخوا ۱۰زره کورنۍ ژوند کوي خو هیڅ روغتيايي مرکز نه لري.
هغه وايي، اوسمهال د ولسوالۍ په کچه څلور ثابت او دوه ګرځنده روغتيايي مرکزونه فعال دي او په نږدې راتلونکې کې به دوه نور هم فعال شي.
بلخوا د ګلستان ولسوالۍ یو شمېر خلک هم وايي چې روغتيايي خدماتو ته پوره لاسرسی نه لري.
د ګلستان ولسوالۍ د مرکز اړوند زړېکلا اوسېدونکي عصمتالله پژواک خبري اژانس ته وویل، د دوی په سیمه کې خلک روغتيايي خدماتو ته لاسرسی نه لري.
هغه وايي، ګلستان یوه غرنۍ ولسوالۍ ده او حکومت باید د خلکو اړتیاوو ته په پام سره روغتيايي مرکزونه فعال کړي.
عصمتالله زیاتوي، دوی په یوه غرنۍ سیمه کې اوسېږي د ولسوالۍ تر مرکزي روغتونه پر موټرسایکل درې څلور ساعته لار ده او په وینا يې ډېری وخت ناروغان روغتون ته د رسېدو پر لار ژوند له لاسه ورکوي.
د دې ولسوالۍ د سیدآهو سیمې اوسېدونکی نقیبالله هم وايي، دوی د ولسوالۍ له مرکزه شاوخوا ۳۰ کیلومټره لرې اوسېږي او روغتيايي خدماتو ته لاسرسی نه لري.
هغه له حکومته وغوښتل چې د دوی په سیمه کې روغتيايي خدمات برابر کړي.
د یادې ولسوالۍ د جوکه سیمې اوسېدونکی عبدالخالق وايي، د دوی په سیمه کې له ۳۰۰۰ ډیرې کورنۍ ژوند کوي خو هیڅ روغتيايي مرکز نشته دي.
هغه وايي، دوی د ګلستان له مرکزه شاوخوا ۳۰ کیلومټره واټن لري او په وینا يې، تر مرکزه د ناروغانو انتقال ستونزمن کار دی.
د یادونې ده، په هېواد کې د تېرو څو لسیزو جګړو له امله د نورو برخو ترڅنګ روغتیا سکټور هم اغېزمن شوی او د ډېری ولایتونو د لرې پرتو سیمو خلک شکایت کوي چې روغتيايي خدماتو ته پوره لاسرسی نه لري.
Views: 89
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن