بغلان کې سلګونه معلولين د کم معلولیت له امله د مياشتني حقوقو له لېسته ايستل شوي

پلخمري (پژواک، ٤ وږی ۱۴۰۲): د بغلان د شهيدانو او معلولینو چارو رياست وايي چې د نوې طرحې له مخې يو شمېر هغه معلولين یې د مياشتني حقوقو له لېسته ايستلي چې مستحق نه وو.

خو بل لور ته معلولين بيا د حکومت له لوري د مياشتني حقوقو پر ورکولو ټينګار کوي.

د بغلان د شهیدانو او معلولينو چارو ريیس قاري عبدالحکیم پژواک خبري اژانس ته وويل، د نوې طرحې او د اسلامي امارت پالیسۍ له مخې، يو شمېر معلولين د مياشتني حقوقو له لېسته ايستل شوي دي.

هغه وايي چې پخواني حکومت داسې يو شمېر کسانو ته د معلوليت کارتونه ورکړي چې مستحق نه دي.

هغه د بېلګې په توګه وويل: «تېر حکومت پر یوه ګوته ټپي شوي کس ته هم د معلوليت په نوم د پیسو اخیستو کارت ورکړی و؛ امارت هغه کسان چې لږ ټپي وي، له لېسته باسي او پر ځای یې ډېر معلول کس چې د کار کولو توان نه لري، د بدن غړي یې له لاسه ورکړي وي، هغه که د جمهوریت کسان وي او که د امارت خو چې د امارت پر نوې طرحې  برابر وي، د ایستل شوو کسانو پر ځای یې لېست کې شاملوي او میاشتني حقوق یې ورکوي.»

هغه زياتوي چې په تېرو پنځو مياشتو کې د تصفيې يوې کمېټې په دې برخه کې کار کړى او له زرو ډېر کسان يې د معلولينو له لېسته ايستلي دي.

خو بلخوا، يو شمېر معلولين بيا د حقوقو غوښتنه کوي.

يوه معلول محمدعوض چې د کندوز په چهاردرې ولسوالۍ کې هوايي بمبار کې پر پښو معلول شوى او د معلوليت کارت لري، وايي، پخوا يې حقوق ترلاسه کول خو له تېرو دوو کلونو راهيسې یې حقوق نه دي ورکړل شوي.

د تورپيکۍ په نوم يوې مېرمنې پژواک ته وويل، ١٥ کاله مخکې د يوې مرمۍ لګېدو له امله معلوله شوه او يو زوى یې ووژل شو.

هغه وايي، پخوا يې هر کال ٣٠ زره افغانۍ خپل د معلوليت او ٣٥ زره افغانۍ یې د زوى د شهادت له کبله ترلاسه کولې خو له تېرو دوو کلونو راهيسې دغه حقوق نه ورکول کېږي.

دوى او يو شمېر نور معلولين او د شهيدانو کورنۍ ټينګار کوي چې حکومت بايد حقوق ورکړي؛ ځکه اقتصادي ستونزې لري.