کابل (پژواک، ۷ تله ۱۴۰۲): د پاکستان بلوچستان ایالات کې یوه جومات ته څېرمه د میلادالبني مراسمو کې د چاودنې له امله ۵۲ کسان وژل شوي او ۵۵ نور ټپیان دي.
د پاکستانۍ ډان خبر رسنۍ راپور له مخې، دغه چاودنه د بلوچستان مستونګ سېمه کې یوه جومات ته څېرمه – چې د میلادالبني مراسم نیول شوي و- نن له غرمې مخکې شوې ده.
سرچینې د سیمې روغتیايي مسوول ډاکټر رشید محمدزي له قوله لیکلي چې په دغه چاودنه کې تر اوسه د مړو شمېر ۵۲ ته او د ټپیانو ۵۵ ته رسېدلی دی خو دغه شمېر مخ په زیاتېدو دی.
د مستونګ سیمې د پولیسو مشر شعیب مسعود بيبيسي ته ویلي: «لومړني شواهد ښيي چې چاودنه احتمالاً د یوه ځانمرګي برید له کبله شوې، په ظاهره یې هدف د خلکو همدا [د میلادالنبیي مراسمو] ګڼه ګوڼه وه.»
تراوسه کومې ډلې د یادې چاودنې مسوولیت نه دی منلی او تحریک طالبان پاکستان، رویټرز خبري اژانس ته ویلي چې دوی په دې چاودنه کې لاس نه لري.
د راپورونو له مخې، روانه میاشت په یاده سېمه کې په یوه بم برید کې د جمعیت علمای اسلام د یو مشر حافظ حمدالله په ګډون ۱۱ کسان ټپیان شوي وو.
Views: 40
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن