جلالاباد (پژواک، ۱۲ تلې ۱۴۰۲): د جاپان «پياېماس» موسسه د نږدې ۱۷۵ زره امریکایي ډالرو په لګښت د ننګرهار ولایت په کوز کونړ ولسوالۍ کې د کونړ سیند اوبو له امله د تخریب شوو ساحو او یو کانال د بیارغونې چارې پیلوي.
د ننګرهار ولایت مقام په خبرپاڼه کې راغلي چې د یادې پروژې تړون نن د جاپان د سولې او روغتيا «پياېماس» موسسې مسوول اووا او د دغه ولایت والي حاجي ملامحمد نعیم اخند ترمنځ لاسلیک شو.
خبرپاڼې د معلوماتو له مخې، د دغې پروژې ټول لګښت ۱۷۴ زره او ۹۲۴ امریکایي ډالره دی چې چارې به د پنځو میاشتو په موده کې بشپړې شي.
خبرپاڼه کې راغلي چې د دغې پروژې کار به په روانه میلادي میاشت کې پيل شي.
د دغه تړون پر مهال د یادې جاپانۍ موسسې مسوول اووا ویلي چې د دې موسسې پخواني مشر ډاکټر ناکامورا له افغانستان او افغانانو سره ډېره مینه درلوده او د دوی ټول ټيم په دې هېواد کې د ځانګړې مېنې له مخې کار، مرسته او همکاري کوي.
د ننګرهار والي حاجي ملا محمدنعيم اخند د یادې ادارې کارکوونکو ته د لا ښې همغږۍ او همکارۍ ډاډ ورکړی دی.
د پياېماېس خیریه بنسټ مشر ډاکټر تتسو ناکامورا ، د ۱۳۹۸ لمریز کال د لېندۍ میاشتي په ۱۲مه، د جلالاباد ښار په لومړۍ ناحیه کې په یوه وسلهوال برید کې له خپلو پنځو افغان همکارانو سره ووژل شو.
ناکامورا شاوخوا ۲۵ کاله د افغانانو په خدمت کې تېر کړل؛ هغه په لومړیو کې پېښور کې د افغان کډوالو درملنه کوله خو بیا افغانستان ته راغی او دلته یې خدمات پیل کړل.
ناکامورا د ننګرهار په ښېوې، درهنور، کامې او بهسودو ولسوالیو کې د خلکو کرنیزو ځمکو خړبولو لپاره ډېرې چارې ترسره کړې دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن