جلالاباد (پژواک، ۱۲ تله ۱۴۰۲): ننګرهار کې چارواکي وايي، د دغه ولايت په مرکز کې د نوي جوړېدونکي او تورخم ګمرکونو ځينو برخو کې د ۱۱ اعشاريه پنځه ميليونه افغانيو په لګښت د بيارغونې چارې پيل شوې.
د ننګرهار د اطلاعاتو او فرهنګ رياست د اطلاعاتو امر صديقالله قريشي بدلون د تلې په ۱۲مه پژواک خبري اژانس ته وويل، د تورخم او د ننګرهار حصار شاهي په ګمرکونو کې د یوولس اعشاریه پنځه میلیونه افغانیو په لګښت د ځینو ودانیزو چارو پروژې پرانیستل شوې.
هغه وايي، دغو پروژو کي د تورخم ګمرک د هنګرونو بیارغونه، د حصار شاهي ګمرک د موټرو د تمځای لپاره د شل جریبه ځمکي هوارول، د اوبو لویې زېرمې جوړول او د لس باب تشنابونو او د اوداسه ځايونو رغول شامل دي.
هغه هيله څرګنده کړه چې د دغو چارو په بشپړېدو سره به سوداګرو او موټرچلوونکو ته اسانتیاوې رامنځته شي.
د قريشي د معلوماتو له مخې، د یادو پروژو لګښت د مالیې وزارت له پراختیایي بودجې ورکول کېږي چي چاري به يې د روان مالي کال تر پایه بشپړې شي.
مسوولين وايي، د ننګرهار نوي ګمرک - چې د روداتو ولسوالۍ په حصارشاهي سيمه کې جوړېږي - په جوړېدو سره به جلالاباد ښار کې د ګڼېګوڼې د کمښت ترڅنګ سوداګرو او موټرچلوونکو ته ډېرې اسانتياوې برابرې شي.
اوسمهال د ننګرهار مرکزي ګمرک د جلالاباد ښار ختيځ لوري ته د هوايي ډګر ترڅنګ د ښار په يوه څنډه کې پروت دی چې ډېره ګڼهګوڼه يې رامنځته کړې ده.
GET IN TOUCH
NEWSLETTER
SUGGEST A STORY
PAJHWOK MOBILE APP