پلخمري (پژواک، ۱۰ لړم ۱۴۰۲): د بغلان امنیه قومانداني وايي، د دغه ولایت په مرکز پلخمري او بورکې ولسوالۍ کې د دوو ترافیکي پېښو له امله ۱۴ کسانو ته مرګژوبله اوښتې ده.
د امنیې قوماندانۍ ویاند مولوي شېراحمد برهاني د لړم په ۱۰مه پژواک خبري اژانس ته وویل، نن له غرمې وروسته د بورکې ولسوالۍ اړوند د توشخ په نوم سیمه کې د موټر چپه کېدو له امله یوه ښځه مړه شوې او د یوې ښځې او ماشوم په ګډون درې کسان ټپیان شوي دي.
هغه زیاته کړه، دغه راز د ولایت د مرکز پلخمري ښار اړوند ډنډغوري سیمه کې هم د موټر چپه کېدو بله پېښه کې لسو کسانو ته مرګژوبله اوښتې.
د بغلان د ترافیکو مدیر قاري نذیرالله عابدي پژواک ته وویل، په دې پېښه کې دوه ښځې او یوه ماشومه مړې شوې، څلور ښځې او درې هلکان ټپیان دي چې د سیمې اوسېدونکو له خوا روغتون ته وړل شوي دي.
Views: 24
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن