قلعهنو (پژواک، ۲۱ لړم ۱۴۰۲): د بادغیس یو شمېر اوسېدونکي له سرپرست حکومته غواړي چې د لومړنیو توکو بیې کنټرول کړي او له هغو هټۍوالو او سوداګرو سره قانوني چلند وکړي چې توکي په لوړه بیه پلوري.
یاد اوسېدونکي وایي که څه هم د ډالرو بیه ټيټه شوې خو تر اوسه د لومړنیو توکو په بیو کې لا هم بدلون نه دی راغلی.
د یادونې ده چې نن ماسپښین یو بجه د یوه امریکايي ډالر د پېر ارزښت ۶۷ افغانۍ و.
د بادغیس یوه اوسېدونکي ابراهیم پژواک ته وویل: «که څه هم له ټولو هېوادونو توکي په ډالرو پېرل کېږي، خو د ډالرو په ټيټېدو سره نه د خوارکي او نه د غیر خوارکي توکو په بیو کې ټیټوالی راغلی.»
نوموړی که څه هم د بیو د کنټرول په برخه کې حکومت ګرم بولي، خو هیله څرګندوي چې په دغه ولایت کې د توکو بیې کنټرول شي.
هغه وویل: «ټولو خلکو ته معلومه ده چې د ډالرو پر وړاندې د افغانیو ارزښت لوړ شوی، خو له بده مرغه کله چې بازار ته ګورو بازار نه کنټرولېږي، څوک چې مسوول دي او د دولتي ادارو په راس کې دي، د بازار کنټرول په لاس کې نه لري چې سوداګر او کسبهکاران پوه کړي چې کله ډالر ټیټېږي باید بیې هم ټيټې شي.»
د بادغیس یو بل اوسېدونکی عبدالغفار هم ورته شکایت لري او په دغه ولایت کې د توکو پر لوړو بیو نیوکه کوي.
نوموړی له مسوولینو هیله لري څو د بازار د بیو په مدیریت کې اقدام وکړي، په بازار کې د کسبهګرو او د توکو له پلورونکو څارنه وکړي.
هغه زیاته کړه: «ډالر مخکې لوړ و، اوس ټيټ دی، خو د خوراکي او غیر خوارکي توکو بیو هیڅ تغییر نه دی کړی، زموږ غوښتنه له دولته دا ده، اوس چې ډالر ټيټ شوی باید نرخونه هم کم کړي.»
خو د قلعهنو ښار ځيني هټۍوال وایي دا چې له سوداګرو توکي په لوړه بیه پېري، مجبور دي چې په لوړه یې وپلوري.
د قلعهنو ښار یوه دوکاندار سیدمحمد عثمان وایي چې دوی ټول سوداګریز توکي له نورو ولایتونو په لوړه بیه اخلي او دغه ولایت ته یې راوړي.
د هغه په خبره، د افغانۍ پر وړاندې د ډالرو له ټيټېدو سره همهاله په ډالرو د توکو پېرل هم لوړ شوي دي.
نوموړی زیاتوي، دوی له نرخونو هیڅکله سرغړونه نه ده کړې او انصاف په نظر کې نیسي.
هغه وویل: «موږ لومړی لاس سوداګر نه یو، موږ خپل ټول توکي د نورو ولایتونو له سوداګرو اخلو، هغوی چې په هر نرخ یې راکړي موږ فقط لږه ګټه اخلو.»
د قلعهنو ښاروالۍ مسوولین دغه ولایت کې د مصرفي توکو لوړې بیې مني.
د قلعهنو ښاروال نظرمحمد وثیق وایي: «بادغیس یو له وارداتي ولایتونو دی او د دغه ولایت ټول مصرفي توکي له نورو ولایتونو راځي چې په دې اړه د مسوولینو له خوا کمه پاملرنه کېږي.»
هغه وویل: «د ښاروالۍ او د څو نورو ادارو موظفین په دوامدار ډول د بازار نرخونه کنټرولوي؛ له سرغړونکو سره قانوني چلند کوي.»
نوموړي ویل: «بادغیس خپل ټول مصرفي توکي له هراته واردوي، په هغه ولایت کې د مسوولینو له خوا نه کنټرولېږي، موږ کمېټه لرو چې په هغه کمېټه کې ښاورالۍ او څو نورې ادارې شاملې دي، تل څارنه لرو او د دوکاندارانو فاکتورونه (خرید بلونه) وینو، که څوک فاکتوري لري او په لوړه بیه اجناس پلوري له هغوی سره قانوني چلند کېږي.»
Views: 14
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن