فاریاب کې یو صراف وژل شوی

میمنه (پژواک، ۲۵ لېندۍ ۱۴۰۲): فاریاب کې ځایي سرچینې وايي چې د دغه ولایت المار ولسوالۍ په چغاتک سیمه کې یو صراف وژل شوی دی.

د فاریاب امنیې قوماندانۍ له جنایي جرمونو سره د مبارزې مدیریت مرستیال داملا محمدمعاوض پژواک خبري اژانس ته وویل، د نعمت‌الله په نوم یو کس چې د المار ولسوالۍ د چغاتک سیمې اوسېدونکی و، تېر ماښام له شپږ بجې وروسته په خپل کور کې د یوه کس له خوا په ډزو ټپي شوی و خو روغتون پر لاره یې ساه ورکړې ده.

معاوض زیاته کړه: «مقتول په ټپي حالت کې خپلې مور ته ویلي چې د قمرالدین په نوم کس ورباندې ډزې کړې دی.»

هغه زیاته کړه، د پېښې په تړاو قمرالدین نومی کس نیول شوی او څېړنې ترې روانې دي.

د المار ولسوالۍ یو مخور محمدامین وايي، مقتول صرافي کوله او د هغو کډوالو حوالې یې اجرا کولې چې ایران کې کار کوي او ښایي د قتل انګېزه یې هم د پیسو موضوع وي.