بغلان کې د ۴۵ میلیون افغانیو په لګښت د ۱۵ پروژو چارې پیل شوې

پلخمري (پژواک، ۹ مرغومی ۱۴۰۲): بغلان کې مسوولین وایي چې د دغه ولایت د مرکز پلخمري په ګډون ۱۴ ولسوالیو کې د باراني اوبو مدیریت او ذخیره کولو ۱۵ پروژو چارې پیل شوې.

د کلیو بیارغونې او پراختیا وزارت سرپرست وزیر ملا محمدیونس اخوندزاده نن د بغلان په دوشي ولسوالۍ کې د دغه ۱۵ پروژو د پیل مراسمو کې وویل چې حکومت په هېواد کې د پراختیایي پروژو په پلې کولو د ټولو افغانانو لپاره د ژوند اسانتیاوو رامنځته کولو ته ژمن دی.

هغه زیاته کړه چې د هېواد په ټولو ولسوالیو کې د ځمکې لاندې اوبو د تقویت او د باراني اوبو مدیریت او ذخیره کولو په موخه یو - یو چکډیم جوړېږي چې لګښت به یې له ۳ میلیون افغانیو ډېر نه وي، خو که د نورو پراختیايي پروژو ترڅنګ دغه پروژې پر وخت پلې شي او سمې مدیریت شي تر یوه بریده به د اوبو کمښت ستونزه ورسره حل کېږي.

د یاد وزارت د برنامو آمر انجنیر اسدالله اعمار په دغو مراسمو کې وویل، د هېواد په ټولو ولسوالیو کې د باراني اوبو مدیریت او ذخیره کولو او ځمکې لاندې اوبو د تقویت لپاره چکډیمونه او بدیلې پروژې په نظر کې نیول شوي او بغلان دویم ولایت دی چې د دغه پروژو کار په کې پیل کېږي.

دغه راز د بغلان د کلیو بیارغونې او پراختیا ریاست د برنامو امر انجنیر وسیم رشیدي پژواک خبري اژانس ته وویل دغه ۱۵ پروژې چې نن یې چارې پیل شوې په راتلونکو دوه‌نیمو میاشتو کې به بشپړې شي.