[restrict paid=”true”]
اټلانټا (پژواک، ۱۱ مرغومی ۱۴۰۲): د افغانستان پخواني ولسمشر حامد کرزي د ملګرو ملتونو امنیت شورا د وروستي پرېکړهلیک څخه چې د افغانستان حاکمیت، خپلواکي، ځمکنۍ بشپړتیا او ملي یووالي درناوي ترڅنګ د یوه آرامه، باثباته او پرمختللي افغانستان لپاره د نړۍوالو ټولنو یووالی ښیي، هرکلی کړی دی.
د ملګرو ملتونو امنیت شورا د مرغومي په اتمه له افغانستان او د سرپرست حکومت له مشرانو سره د تعامل څرنګوالي او ډېرېدو او دغه راز د افغانستان لپاره د یوه ځانګړي استازي ټاکلو په اړه یو پرېکړهلیک تصویب کړ.
په یاد پرېکړهلیک کې د ملګرو ملتونو امنیت شورا د ملګرو ملتونو له عمومي سرمنشي انتونیو ګوتریش څخه غوښتي څو د فریدون سینیرلي د سپارښتنو ترویج لپاره په ځانګړي توګه د جنسیت او بشري حقونو په اړه، ځانګړی استازی معرفي کړي.
یاد پرېکړهلیک د امنیت شورا په ۱۳ موافقو رایو تصویب شو. روسیې او چین یاد پرېکړهلیک ته ممتنعه رایې ورکړې.
په یاده اعلامیه کې راغلي: «د ځانګړي همغږي کوونکي د ارزونې په اړه د دغه سازمان د دوو دايمي غړو د زيات وخت، بحث او وضاحت له غوښتنې سره، د امنيت شورا له افغان حکومت سره له مشورې پرته دغه پرېکړهليک تصويب کړ.»
د افغانستان پخواني ولسمشر حامد کرزي د ملګرو ملتونو د امنیت شورا د ۲۷۲۱ شمېرې له پرېکړهلیک څخه چې د افغانستان حاکمیت، خپلواکي، ځمکنۍ بشپړتیا او ملي یووالي ته د درناوي او د یوه آرامه، باثباته او پرمختللي افغانستان لپاره د نړۍوالو ټولنو یووالی ښیي، هرکلی کړی دی.
نوموړي په یوه اعلامیه کې چې نن د مرغومي په ۱۱مه خپره شوې ویلي، څرنګه چې په دغه پرېکړهلیک او د ملګرو ملتونو د سرمنشي خپلواکه اروزنې په راپور کې ذکر شوي، ملي تفاهم او د خلکو د ارادې تمثیل په هېواد کې د دايمي سولې او ثبات ټينګښت لار بولي او دغه راز د نجونو او هلکانو تعلیم او د ټولنې په ټولو چارو کې د ښځو ونډه د هېواد د پرمختګ لپاره مهم بولي.
پخوانی ولسمشر افغانستان ته د نړۍوالې ټولنې د پاملرنې په ستایلو ټینګار کوي چې بالاخره له ستونزو څخه د وتلو او تلپاتې سولې او ثبات ته د رسېدو کیلي د افغانانو په لاس کې ده.
حامد کرزی له ټولو هېوادوالو په ځانګړي توګه له سرپرست اسلامي حکومته غواړي چې د هېواد د ارامي او سوکالي او په نړۍوال نظام کې افغانستان د خپل وړ ځاى ترلاسه کولو لپاره دې ګده هڅه وکړي.
له دې مخکې د افغانستان سرپرست حکومت د بهرنیو چارو وزارت له کابل سره د تعامل څرنګوالي او د یوه ځانګړي استازي ټاکلو لپاره د ملګرو ملتونو د امنیت شور تصویب شوی پرېکړهلیک غیرضروري بللی و.
د افغانستان د بهرنیو چارو وزارت ویاند عبدالقهار بلخي د شنبې په ورځ (د مرغومي ۹مه) د یوې اعلامیې په خپرولو سره ویلي: «د افغانستان حکومت یو وار بیا تکراروي چې په افغانستان کې د ملګرو ملتونو مرستندوی دفتر (یوناما) په فعال حضور کې د افغانستان لپاره د یوه اضافي ځانګړي استازي ټاکل غیرضروري بلل کېږي؛ ځکه ځمکني واقعیتونه ښکاره کوي چې افغانستان په جکړه کې ښکیل نه دی او اوسمهال مرکزي حکومت لري چې کولای شي د هېواد ګټې تامین کړي او پر خپلو مکلفیتونو عمل وکړي.»
د افغانستان د سرپرست حکومت د بهرنیو چارو وزارت په اعلامیه کې راغلي: «په داسې حال کې چې موږ له افغانستان سره د لا پياوړي او پراخ تعامل لپاره د ملګرو ملتونو له ټولو مثبتونو تعاملونو هرکلی کوو، خو په نهایت کې زموږ کړنلارې به د افغانستان خلکو د مذهبي باورونو، کلتوري ارزښتونو او د ملي ګټو پر اساس وي.»
سرچینې له ملګرو ملتونو غوښتي چې د افغانستان په اړه د پرېکړو پر مهال شته واقعیتونه په پام کې ونیسي او پرېکړې یې د هیڅ لوري تر اغېز لاندې را نشي.
د ملګرو ملتونو د عمومي منشي دفتر د اپریل په ۲۵مه ترکي ډيپلومات فریدون سینیرلي اوغلو د افغانستان لپاره ځانګړی همغږي کوونکی او خپلواک مفتش وټاکلو.
سینیرلي اوغلو افغانستان ته په سفر او د طالبانو له مشرانو، بهر کې مېشت له پېژندل شوو افغانانو سره په لیدنو او د نړۍ او سیمې ښکېلو هېوادونو ته د سفر په ترڅ کې د وضعیت ارزونه وکړه.
یاده ارزونه سپارښتنه کوي چې په افغانستان کې د ټول شموله حکومت د رامنځته کېدو او د تلپاتي سولې د تضمین او اقتصادي پراختیا لپاره باید ملي خبرې اترې پیل شي.
د سینیرلي اوغلو له وړاندیزونو یو په نړۍواله ټولنه کې د طالبانو تر واکمني لاندې د افغانستان د «بشپړ ادغام» په موخه د سیاسي مشارکت لپاره «د لارې نقشه» ده چې له ډېرو نیوکو، په ځانګړې توګه د اسلامي امارت د مخالفو سیاسي ډلو له نیوکو سره مخ شوې ده.
[/restrict]
Views: 64
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن