[restrict paid=”true”]
کابل (پژواک، ۱۶ مرغومی ۱۴۰۲): د کابل ښار شپږمې امنیتي حوزې مربوطاتو کې پر یوه کاسټر موټر د چاودنې له امله دوه کسان وژل شوي او ۱۴ نور ټپیان دي.
د کابل امنیې قوماندانۍ ویاند خالد ځدراڼ د مرغومي په ۱۶مه پژواک خبري اژانس ته وویل چې چاودنه نن له ماښام وروسته شاوخوا شپږنیمې بجې د شپږمې حوزې اړوند په دشت برچي سیمه کې شوې ده.
هغه زیاته کړه: «د کابل ښار شپږمې حوزې اړوند دشت برچي سیمه کې د سپرلیو پر یوه کاسټر موټر کې چاودنه شوې چې د لومړنیو معلوماتو له مخې، له بده مرغه دوه تنه عام هېوادوال شهیدان شوي او ۱۴ نور ټپیان دي.»
د ځدراڼ په وینا، ټپیان روغتونونو ته رسول شوي او د پېښې په اړه د پولیسو له لوري پلټنې روانې دي.
د داوود په نړن د دشت برچي یوه اوسېدونکي پژواک ته وویل چې چاودنه په قلعه ناظر سیمه کې د سپرلیو پر یوه ښاري بس (کاسټر) شوې وه.
هغه زیاته کړه چې له چاودنې وروسته موټر اور واخیست خو د اطفایې له راتلو وروسته اور مهار شو.
دی وایي چې ګڼ شمېر کسان په امبولانسونو کې ولېږدول شول خو د مرګژوبلې شمېرې په اړه یې معلومات نه درلودل.
د دې چاودنې مسوولیت تر اوسه کومې ډلې پر غاړه نه دی اخیستی.
[/restrict]
Views: 521
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن