کابل (پژواک، ۲۱ مرغومی ۱۴۰۲): د افغانستان کانونو او پټرولیم وزارت، له څلورو کورنیو شرکتونو سره د څه باندې ۱۰.۱۵ میلیارد افغانیو په ارزښت درېیو ولایتونو کې د څلورو لویو کانونو د استخراج او پروسس تړونونه لاسليک کړل.
یاد تړونونه نن د کانونو او پټرولیم وزارت کې د یاد وزارت سرپرست شېخ الحدیث شهابالدین دلاور د څلورو کورنیو شرکتونو له مسوولینو سره لاسلیک کړل.
دلاور د تړونونو د لاسلیک په مراسمو کې وویل چې د هرات د کرخ ولسوالۍ د مسجد چوبي سیمې د سکرو ډبرو، د بغلان ولایت د دوشي ولسوالۍ د قرهزغن سیمې د سرو زرو کان، د هرات پشتونزرغون ولسوالۍ د اوسپنې کان او د پروان کوهصافي ولسوالۍ د کرومایټ ډبرو کان په یادو څلورو کانونو کې شامل دي.
دی وایي چې د یادو تړونونو له مخې، «حضرت بلال خالد لمېټډ» شرکت د کرخ ولسوالۍ د سکرو ډبرو کان د استخراج او پروسس برخه کې څه باندې ۱۵۱ میلیونه او ۷۲۸ زره افغانۍ، «د مدثراشنا» شرکت د بغلان د قرهزغن سیمه کې د سرو زرو د استخراج او پروسس برخه کې څه باندې ۱۲۴ میلیونه او ۹۷۹ زره افغانۍ پانګونه کوي.
هغه زیاتوي د یادو تړونونو له مخې، د «همګرایان غرب» شرکت د هرات پشتون زرغون ولسوالی د اوسپنې استخراج او پروسس برخه کې څه باندې نهه میلیارده او ۸۰۷ میلیونه او ۳۸۲ زره افغانۍ او د «علیم شاه بابا» شرکت د پروان ولایت کوه صافي کرمایټو استخراج او پروسس برخه کې ۱۸۰ میلیونه او ۲۰۶ زره افغانۍ پانګونه کوي.
دلاور وايي چې د یادو کانونو پروسس په کور د ننه ترسره کېږي او له لارې به یې سلګونو کسانو ته د کار زمينه هم برابره شي.
د کانونو او پټرولیم وزارت د معلوماتو له مخې، له یادو څلورو شرکتونو سره دغه تړونونه د ۳۰ کلونو لپاره شوي دي.
د «مدثر اشنا» شرکت مسوول ولي محمد د قراردادي شرکتونو په استازیتوب خبرې وکړې او ډاډ یې ورکړ چې د یادو کانونو چارې به له تړونونو سره سمې پر مخ یووړل شي.
هغه د اسلامي امارت د اړوندو ادارو له خوا له شرکتونو سره د همکارۍ او ملاتړ غوښتنه وکړه.
Views: 64
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن