سمنگان کې د ترافیکي پېښو له امله یو کس مړ او نهه نور ټپیان شوي

ایبک (پژواک، ۲۳ مرغومی ۱۴۰۲): د سمنګان سیمه‌ییز مسوولین وايي چې په دغه ولایت کې د څلورو جلا ترافیکي پېښو له امله یو کس مړ او د درېیو ښځو او یوه ماشوم په ګډون نهه نور ټپیان شوي دي.

د سمنګان د ترافیکو مدیر قاري محمدنذیر سعد پژواک خبري اژانس ته وویل چې په دغه ولایت کې په تېرو ۲۴ ساعتونو کې څلور ترافیکي پېښې شوې دي.

هغه وویل، یو کرولا موټر چې له کندوزه بلخ ته پر لاره و، د سمنګان د خلم ولسوالۍ مربوطاتو کې له سړکه وتلی او چپه شوی دی.

هغه زیاتوي، یاده پېښه کې یو کس مړ شوی او پنځه نور ټپیان شوي دي.

د هغه په وینا، د یادې پېښې ټپيان او مړ شوی کس د یوې کورنۍ غړي دي.

نوموړي دغه راز وویل، د دې ترڅنګ د سمنګان د مرکز په مربوطاتو کې په درېيو نور جلا ترافیکي پېښو کې هم څلور کسان ټپیان شوي دي.

هغه وویل چې ټپیان د سمنګان ولایتي روغتون ته لېږدول شوي دي.

د سمنګان د ترافیکو مدیر د یادو پېښو لامل د چلوونکو بې‌احتیاطي او له حد ډېر سرعت بولي.