پروان کې د ترافیکي پېښې له امله درې کسان مړه او یو بل ټپی شوی

چاریکار (پژواک، ۲۴ مرغومی ۱۴۰۲): د پروان د سیاه‌ګرد ولسوالۍ په چهارده سیمه کې د یوې ترافیکي پېښې له امله درې کسان مړه او یو بل ټپي شوی دی.

د پروان امنیې قوماندانۍ ویاند  فضل‌الرحیم مسکین‌یار وایي چې پرون له غرمې وروسته شاوخوا څلورنیمې بجې په یاده سیمه کې یوه سراچه موټر له موټرسایکل سره ټکر کړی دی.

هغه وایي چې په پېښه کې درې موټرسایکل سپاره چې د سیاه‌ګرد ولسوالۍ اوسېدونکي وو، مړه شوي او د سراچې چلوونکی چې د پروان د سرخ‌پارسا ولسوالۍ اوسېدونکی دی ټپی شوی دی.

مسکین‌یار وایي چې د پېښې قربانیان امنیتي کسانو د پروان ملکي روغتون ته لېږدولي او پېښه د ترافیکو مدیریت له لوري تر څېړنو لاندې ده.