کابل (پژواک، ۱۰ سلواغه ۱۴۰۲): د اقتصادي کمېسیون تخنیکي کمېټې د نباتي غوړیو له اړخه د ځان بسیاینې طرحه په پرنسیپ کې تایید کړه او پرېکړه یې وکړه چې د نوري فایبر نوو متقاضیانو ته جوازونو ورکړي.
د ریاستالوزراء اقتصادي معاونیت په خبرپاڼه کې راغلي چې د اقتصادي کمېسیون تخنیکي کمېټې پرون د نباتي خوراکي غوړیو د ځان بسیاینې طرحه په پرنسیپ کې تایید کړه او د کرنې، اوبولګولو او مالدارۍ وزارت استازو ته یې دنده وسپارله څو دغه طرحه د اوبو او برېښنا او صنعت او سوداګرۍ له وزارتونو سره شریکه کړي او د هغوی نظرونو ته په پام یې غني او یادې کمېټې ته وړاندې کړي.
سرچینه لیکي، په دې غونډه کې پرېکړه وشوه چې د نوري فایبر نوو متقاضیانو ته دې نوي جوازونه د نړۍوالې داوطلبۍ له لارې ورکړل شي او له وړ شرکتونو سره د قراردادونو منظوري دې اقتصادي کمېسیون ته راجع شي.
دغه راز د سرچینې معلوماتو له مخې، د اقتصادي کمېسیون تخنیکي کمېټې له لوري د چاپېریالساتنې ملي ادارې د نوو عایداتي سرچینو پر طرحه هم بحث وشو.
په خبرپاڼه کې راغلي چې په دې ناسته کې د چاپېریالساتنې ملي ادارې استازو ته دنده وسپارل شوه څو یاده طرحه له اړوندو وزارتونو او ادارو سره شریکه کړي او د هغوی له نظرونو سره یې دې یادې کمېټې ته وسپاري.
