لښکرګاه (پژواک، ۱۷ سلواغه ۱۴۰۲): د هلمند د عامې روغتیا ریاست مسوولین وایي، تېره یوه اونۍ کې یې د دغه ولایت د ګرمسیر، ګرشک او موسیکلا ولسوالیو په روغتونو کې د توبرکلوز ناروغۍ د تشخیص «جن اېکسپرټ» درې پایې ماشینونه فعال کړي دي .
د هلمند د عامې روغتیا رییس ډاکټر سیداحمد سعید پژواک خبري اژانس ته وویل، یاد ماشینونه چې دوه یې د عامې روغتیا وزارت د توبرکلوز امریت او یو یې هم د روغتیایي علومو د موسسې له لوري د ۹۰ زره امریکایي ډالرو په ارزښت پېرل شوي، د توبرکلوز ناروغۍ د تشخیص په برخه کې به ورڅخه کار اخیستل کېږي.
د نوموړي په خبره، د توبرکلوز ناروغۍ د تشخیص «جن اېکسپرټ» ماشینونه د ګرمسیر، موسیکلا او ګرشک ولسوالیو په مرکزي روغتونونو کې فعال او د روغتیایي علومو د موسسې له لوري نصب او ګټي اخیستنې ته سپارل شوي دي.
د یاد ولایت د عامې روغتیا ریاست د توبرکلوز مدیر ډاکټر شکراناحمد فقري وایي، په پلان کې لري چې په راتلونکو درېیو میاشتو کې دغه ډول یو بل ماشین د لښکرګاه ښار د کارته لګان په روغتیایي مرکز کې هم فعال کړي.
د یادوني ده، هلمند کې د بُست ولایتي روغتون له وړاندې دوه پایې دغه ډوله فعال ماشینونه لرل چې له دې سره به دغه ولایت کې د توبرکلوز ناروغۍ د تشخیص او درملنې برخه کې ګڼې اسانتیاوې رامنځته شي.
Views: 41
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن