قلعه نو (پژواک، ۲۵ سلواغه ۱۴۰۲): ځایي مسوولین وایي چې د بادغیس ولایت د مرکز قلعه- مقر ترمنځ پر لویه لاره دترافيکي پېښې له امله لسو کسانو ته مرګ ژوبله اوښتې ده.
د دې ولایت امنیه قوماندانۍ لخوا د سلواغې په ۲۵مه په یوه خپره شوې خبرپاڼه کې راغلي چې دا پېښه نن ماښام د مقر ولسوالی اړونده د خاک کوتل په سيمه کې رامنځته شوې ده.
سرچینې زیاته کړې، هلته د یوه سراچه او لوکسل موټر ترمنځ د ټکر له امله درې تنه مړه او اوه نور ژوبل شوي دي.
په خبرپاڼه کې راغلي چې په مړو او ټپیانو کې ښځې او ماشومان هم شامل دي.
د یادونې وړ ده چې په دې وروستیو کې ترافیکي پېښې زیاتې شوې دي، د پژواک د خپاره شویو خبرونو له مخې، د روان لمریز کال له پیل راهیسې په ټول هېواد کې د ترافیکي پېښو له امله شاوخوا څلور زره کسانو ته مرګ ژوبله اوښتې ده.
Views: 18
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن