پارون (پژواک، ۳۰ سلواغه ۱۴۰۲): په ختيځ زون کې د ۲۰۱ خالد بن وليد قولاردو وايي چې د نورستان نورګرام ولسوالۍ ته مرستندوی ټيمونه لېږل شوي څو د غره ښویېدنې پېښه کې تر خاورو لاندې شوو کسانو په راایستلو کې همکاري وکړي.
تېره شپه شاوخوا ۱۲ بجې د نورستان تتین درې په نقره کلي کې د سختې واورې اورېدو له امله غر ښويېدلی چې له امله يې د دغه کلي ډېر کورونه نړېدلي او ګڼ کسان تر خاورو او تيږو لاندې شوي دي.
پېښو ته د رسېدو چارو کې د دولت وزارت وياند مولوي محمد عبدالله جان په يو ويډيوي پيغام کې ويلي چې د نقره درې پېښه کې تر اوسه ۲۵ کسان مړه شوي او ۸ نور ټپيان شوي دي.
هغه وايي، د سختې واورې ورېدو له امله د دغه ولايت د ډېرو سيمو لارې تړل شوې دي.
بلخوا په ختيځ کې د ۲۰۱ خالد بن وليد قولاردو وياند مولوي وحيدالله محمدي پژواک خبري اژانس ته وويل چې د دې قولاردو د مشر په امر د نورستان نورګرام ولسوالۍ د غره ښويېدنې پېښې سيمې ته مرستندويه ډله رسېدلې ده.
دی وايي، د قولاردو څلورمې پلې لوا منسوبينو اوسمهال د پېښې په ځای کې د ژغورنې عمليات پيل کړي او د نورو مرستو ترڅنګ د ټپيانو لومړنۍ درملنه هم پيل شوې ده.
دغه راز په نورستان کې د سرې مياشتې رياست مسوولينو هم یادې سيمې ته ځانونه رسولي او د نورګرام ولسوالۍ ځايي چارواکو هم له سهار راهیسې د ژغورنې چارې پيل کړې دي.
Views: 56
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن