د کونړ – نورستان لویه لاره بېرته پرانیستل شوه

پارون (پژواک، ۱۵ کب ۱۴۰۲): د نورستان ولايت د ټولګټو چارو رياست مسوولين وايي، د کونړ – نورستان لويه لار چې څلور ورځې مخکې د واورې ډېر ورښت له امله تړل شوې وه، بېرته د ترافيکو پر مخ پرانیستل شوه.

یاده لاره د کب په ۱۲مه د ترافيکو پر مخ تړل شوې وه او تېره شپه بېرته پرانیستل شوې ده.

د نورستان د ټولګټو رييس مولوي احمدنبي عادل د کب په ۱۵مه پژواک خبري اژانس ته وويل، د نورستان - کونړ لویه لار چې د تېرو څلور ورځو راهیسې د واورې ورښت له امله تړل شوې وه، تېره شپه اته بجې د دغه ریاست د تخنیکي ټیم په هڅو بېرته پرانیستل شوه.

هغه وويل، له نن سهار څخه خلکو بېرته تګ راتګ پيل کړی او له کومې ستونزې او ځنډ پرته کولای شي چې تګ راتګ وکړي.

د نورستان مرکز پارون ته د کونړ ولايت له مرکز اسعداباد څخه لار ورغلې چې کله نا کله د واورې ورښت او نورو ستونزو له امله تړل کېږي.